یہاں میونسپل کارپوریشن کی بے حسی اور نااہلی کے باعث سبزی مارکیٹ کیلئے مختص قطعہ اراضی ڈمپنگ گراونڈ میں تبدیل ہوگئی ہے۔

یہاں میونسپل کارپوریشن کی بے حسی اور نااہلی کے باعث سبزی مارکیٹ کیلئے  مختص قطعہ اراضی ڈمپنگ گراونڈ میں تبدیل ہوگئی ہے۔کچروں کے انبار کے باعث بازار میں خریداری کیلئے آنے والے شہری، دکاندار اور مقامی افراد تعفن سے پریشان ہیں۔ واضح  رہےکہ تقریباً ۲۰؍  برس قبل بھیونڈی میونسپل کارپوریشن نے تین بتی سے ملحق شیواجی نگر میں سبزی مارکیٹ کیلئے سروے نمبر۵۶؍ مختص کیا تھا۔ تاہم مبینہ کمزور سیاسی قیادت اورمقامی عوامی نمائندوں کی بے حسی کے باعث۲۰؍ برس گزرجانے کے باوجود میونسپل کارپوریشن کی جانب سے یہاں سبزی مارکیٹ کی عمارت تعمیر ہی نہیں کرسکی۔ نتیجتاً یہ قطعہ اراضی یوں ہی خالی پڑا رہا۔   لوگوں نے یہاں کچرا پھینکنا شروع کردیا۔ مسئلہ اس وقت سنگین ہوگیا جب کارپوریشن کی جانب سے کچرا اٹھانے والی ٹھیکیدار کمپنی نے اس جگہ کو کچرا جمع کرنے کا مرکز بنادیا۔  وہ اس قطعہ اراضی پر پورے علاقے کا کچرا جمع کرکے اسے چاوندرا ڈمپنگ گراونڈ پر پھینکتی  ہے۔ کئی دنوں سے یہاںسے کچرا نہیں اٹھایا گیا  جس کی وجہ سے شیواجی نگر، ٹھانگے آلی، کھڑگ روڈ، نظام پورہ اور کاسار آلی علاقے میں تعفن اورمچھروں کی افزائش بڑھ گئی ہے۔
  سٹی انجینئر سنیل گھوگے نے بتایا کہ میونسپل کارپوریشن نے مارکیٹ کی نئی عمارت کی تعمیر کیلئے سروےنمبر۵۶؍مختص کیا ہےلیکن میونسپل کارپو ریشن کے پاس مارکیٹ کی عمارت کی تعمیر کے لیے فنڈ نہیں ہیں جس کے لیے حکومت سے فنڈز کا مطالبہ کیا گیا ہے۔ فنڈز ملنے پر مارکیٹ کی عمارت تعمیرکر دی جائے گی۔چیف سینی ٹیشن آفیسر جیونت سوناؤنے  بتایا کہ ڈمپنگ گراؤنڈ شہر سے بہت دور ہے۔ٹھیکیدار کمپنی کو کھڑگ روڈ پر واقع کچرا جمع کرنے کے مرکز سے روزانہ کچرا اُٹھانے کا حکم دیا گیا ہے۔