گجرات دورے پر پارٹی لیڈروں اور کارکنوں سے ملاقات میں اعلان کیا

کانگریس کے سینئر لیڈر اور لوک سبھا میں اپوزیشن لیڈر راہل گاندھی گجرات کے دو روزہ دورے پر ہیں۔ اس دوران وہ متعدد ملاقاتیں کر رہے ہیں، جن میں پارٹی کے لیڈروں، کارکنوں اور مقامی انتخابی امیدواروں کے ساتھ تفصیلی گفتگو شامل  ہے۔ اس دوران انہوں نے بالکل دوٹوک انداز میں کہا کہ گجرات کانگریس میں موجود ایسی کالی بھیڑیں جو بی جے پی سے ساز باز رکھتی ہیں انہیں نکال باہر کیا جائے گا۔ انہوں نے کہا کہ ایسے کم از کم ۳۰؍ سے ۴۰؍ لیڈران ہوں گے جو بی جے پی سے ساز باز کررہے ہیں۔ انہیں باہر کا راستہ دکھانا پڑے گا۔ راہل گاندھی نے یہ اعتراف بھی کیا کہ گجرات میں پارٹی کی تنظیمی حالت خراب ہے، لیڈر شپ کا فقدان ہے لیکن ہم دوبارہ اٹھ کھڑے ہونے کی طاقت رکھتے ہیں۔ 
 پارٹی کارکنان سے خطاب کرتے ہوئے  راہل نے کہا کہ گجرات کانگریس میں ۲؍ طرح کے لوگ ہیں۔ ایک جو عوام کے ساتھ کھڑے ہیں، عوام کے لیے لڑتے ہیں اور جن کے دل میں کانگریس کا نظریہ ہے۔ دوسرے وہ ہیں جو عوام سے کٹے ہوئے ہیں، عوام سے دور بیٹھتے ہیں، عوام کی عزت نہیں کرتے ہیں اور اس میں نصف سے زائد بی جے پی سے ملے ہوئے ہیں۔  جب تک ہم ان دونوں گروپ کو الگ نہیں کریں گے، تب تک گجرات کے لوگ ہم پر بھروسہ نہیں کریں گے۔ ان لوگوں کو باہر کا  راستہ دکھانا ضروری ہے۔