ایس آئی آر  کے دباؤ میں ملک بھر میں  بوتھ لیول آفیسرس کی خود کشی اور اموات کا سلسلہ تھمنے کا نام نہیں  لے رہاہے۔ اتوار کو مرادآباد میں بھی   ایک ٹیچر نے    ہدف پورا نہ کرپانے کی وجہ سے پھانسی لے  لی۔  ۴۶؍ سالہ سرویش سنگھ کی لاش  اتوار کی صبح پھندے سے لٹکی ہوئی ملی۔ جان دینے سے پہلے  انہوں نے بیسک ایجوکیشن آفیسر کے نام ۳؍صفحات پر مشتمل سوسائڈ نوٹ لکھا، جس میں انہوں نے’’ایس آئی آر‘‘سے پریشان ہونے کا ذکر کیا۔انتظامیہ کی بے حسی کا اندازہ اس بات سے لگایا جاسکتاہے کہ ضلع مجسٹریٹ نے خود کشی نوٹ کے باوجود  سرویش سنگھ کی موت کو ایس آئی آر کے دباؤ کا نتیجہ ماننے سے انکار کردیاہے۔ 

سرویش سنگھ جو بھگت پور ٹانڈا تھانہ علاقے کے گاؤں زاہد پور سکندر پور کمپوزٹ اسکول میں  اسسٹنٹ ٹیچر  تھے،کو۷؍ اکتوبر کو بی ایل او بنایا گیا تھا۔ انہوں نے اپنے ضلع (مراد آباد)کے  الیکٹورل آفیسر اور بنیادی تعلیم کے اعلیٰ افسر کے نام لکھے گئے خود کشی نوٹ میں لکھا ہے کہ ’’رات دن کام کرتا رہا، پھر بھی  ایس آئی آر کا ٹارگٹ پورا نہیں کر پا رہا ہوں۔ رات بہت مشکل اور پریشانی میں گزرتی ہے۔ صرف ۲؍سے ۳؍ گھنٹے سو پا تا ہوں۔ میری چار بیٹیاں ہیں، ۲؍کئی دنوں سے بیمار ہیں۔ میں جینا تو چاہتا ہوں مگر کیا کروں، بہت بےچینی ہے۔گھٹن محسوس ہوتی ہے  اور میں خود کو خوفزدہ محسوس کر رہا ہوں۔ میری چار معصوم بچیوں کا خیال رکھنا۔ اگر وقت زیادہ ہوتا تو شاید میں یہ کام مکمل کر دیتا، مگر جو وقت ملا وہ کافی نہیں تھا، کیونکہ میں پہلی بار بی ایل او بنا تھا۔‘‘

سرویش نے خودکشی سے پہلے ایک ویڈیو بھی بنایا تھا، جو سنیچر کا بتایا جا رہا ہے۔ ویڈیو میں وہ پھوٹ پھوٹ کر روتے ہوئے نظر آ رہے ہیں۔ دل کو چھلنی کردینےوالے اس ویڈیو میں وہ  اپنی ماں کو پکار رہے ہیں اور اپنی چھوٹی چھوٹی بیٹیوں کا خیال رکھنے درخواست کررہے ہیں۔  یوپی میں ایس آئی آر  شروع ہونے کے بعد سے اب تک ۷؍ بی ایل او زکی جان جا چکی ہے۔ ان میں سے ۳؍نے خودکشی کی، ۳؍ کی موت دل کا دورہ پڑنے سے اور ایک کی  دماغ کی نس پھٹ جانے سے ہوئی ہے۔ ا س کے علاوہ مدھیہ پردیش میں ۹؍ گجرات میں ۴؍ اور مغربی بنگال میں ۴؍ بی  ایل اوز کی موت ہوچکی ہے۔  ملک بھر میں  ۲۵؍ سے زائد بی ایل او ایس آئی آر کی وجہ سے جان گنوا چکے ہیں۔