برہن ممبئی میونسپل کارپوریشن(بی ایم سی) کا انتخاب ۱۵؍  جنوری کو ہونے والا ہے اور اس چنا ؤ میں بی ایم سی کمشنر اور ممبئی کے الیکشن آفیسر بھوشن گگرانی نے رائے دہندگان سے اپیل کی ہے کہ وہ ووٹ  دیتے وقت اپناموبائل فون لے جانے سے گریز کریں یا اسے بند کر کےپولنگ بوتھ پر جائیں۔ 

موبائل کے استعمال کے تعلق سے  ذرائع ابلاغ کے نمائندوں کے ذریعے پوچھے گئے سوال پر میونسپل کمشنر نے کہاکہ ’’ ابتک الیکشن کمیشن کی جانب سے اس بارے میں کوئی واضح ہدایت موصول نہیں ہوئی ہے ۔ موبائل لے جانے پر کوئی پابندی بھی عائد نہیں کی گئی ہے لیکن ہماری درخواست ہے کہ اسے بند کر کے ووٹنگ کریں۔ پولنگ  بوتھ پر نہ لے جائیں۔

میونسپل کمشنر نے مزید تفصیلات بتائی کہ شہری انتظامیہ نے تمام تر تیاریاں مکمل کر لی ہیں۔ اس الیکشن میں ۲؍ ہزار ۲۷۸؍ مقامات پر ۱۰؍  ہزار ۲۳۱؍ پولنگ اسٹیشن قائم کئے گئے ہیں۔  ان تمام پولنگ اسٹیشن پر بنیادی سہولتیں مثلاً پینے کا پانی ، شیڈ، بیت الخلاء، معذوروں کیلئے ریمپ اور دیگر سہولتیں مہیا کرائی گئی ہے۔

افسر نے یہ بھی کہا کہ ووٹروں کو ان کے پولنگ سینٹر کی اطلاع دینے والی ووٹر سلپ کی تقسیم جاری ہے اور ۱۳؍ جنوری تک ووٹروں کو ان کے گھر یہ سلپ پہنچا دی جائے گی۔