عدالت نے ایک ہفتہ کے اندر تمام قبائلی علاقوں کے اسپتالوں میں گائناکولوجسٹ اور ماہر اطفال ڈاکٹروں کا تقرر کرنے کا حکم دیا

مہاراشٹر کے مختلف قبائلی علاقوں میں خاص کر ودربھ کے پسماندہ علاقوں میں طبی سہولیات کا غیر انسانی حد تک فقدان ہے جس کی وجہ سے وہاں کئی بچوں کی اموات ہو چکی ہیں۔ اسی تعلق سے ایک عرضداشت بامبے ہائی کورٹ میں داخل کی گئی ہے۔ سماعت کے دوران  بچوں کی اموات سے متعلق کورٹ کو یہ بتایا گیا کہ ودربھ کے ضلع امراوتی میں واقع میل گھاٹ علاقے  میں ایک حاملہ خاتون کو بنیادی طبی سہولت نہ مل پانے کے سبب پیدائشی سے قبل ہی اس کے بچہ کی موت ہوگئی۔ اس پر بامبے ہائی کورٹ نے  سخت برہمی کا اظہار کرتے ہوئے ایک ہفتہ کے درمیان تمام قبائلی علاقوں کے اسپتالوں میں گائناکولوجسٹ اور ماہر اطفال کا تقرر کرنے کا حکم دیا ۔
 بامبے ہائی کورٹ کی دو رکنی بنچ کے جسٹس ریوتی موہت ڈیرے اور جسٹس سندیش پاٹل نے حاملہ خاتون کی زچگی کے وقت بچہ کی موت کی اطلاع پر انتہائی افسوس اور رنج کا اظہار کرتے ہوئے کہا کہ ’’ یہ انسانی نقطہ نظر سے قابل افسوس بات ہے کہ مہاراشٹر کے قبائلی علاقوں میں ہر بار طبی سہولت اور غذائی قلت کے سبب اموات ہوتی ہیں۔ ہر بار شنوائی کے دوران بچوں کی اموات کا تذکرہ سن کر عجیب سی کیفیت طاری ہوجاتی ہے۔ گزشتہ سماعت سے لے کر اب تک ہمارے سامنے ۶؍ بچوں کی اموات کا ذکر کیا جاچکا ہے ۔‘‘ اس پر عرضداشت گزار ڈاکٹر راجندر بھرما اور ڈاکٹر بنڈو سمپت راؤ  کے وکیل نے بتایا کہ گزشتہ ماہ نومبر میں نہ صرف بچے بلکہ طبی سہولتوں کے فقدان کے سبب دو حاملہ خاتون کی بھی موت ہوچکی ہے ۔ انہوں نے یہ بھی کہا کہ امراوتی کے  میل گھاٹ اور دیگر قبائلی علاقوں میں ماہر ڈاکٹروں کے فقدان کے سبب بچوں کی اموات میں اضافہ ہی ہوتا جارہا ہے۔ اسی درمیان حکومت کی جانب سے وکیل بھوپیش سامنت نے بتایا کہ کمیٹی کے سینئر افسران نے میل گھاٹ کا دورہ کیا ہے اور وہاں کے حالات سے متعلق رپورٹ پبلک ہیلتھ سیکریٹری ڈاکٹر نپون ونائیک کو سونپی ہے جس کا جائزہ لینے کے بعد ماہر ڈاکٹروں کی تقریری کی جائے گی۔ کورٹ نے عرضداشت گزاروں کی فراہم کردہ اطلاع پر سخت برہمی کا اظہار کرتے ہوئے ایک ہفتہ میںگائناکولوجسٹ اور ماہر اطفال کی تقرری کرنے کا حکم دیا ۔ یاد رہے کہ ودربھ کا میل گھاٹ علاقہ مہاراشٹر کا سب سے پسماندہ علاقہ سمجھا جاتا ہے جہاں گائوں تک جانے کے راستے اور پینے کا پانی تک میسرنہیں ہے۔