سپریم کورٹ نے کہا کہ وہ ملک کی تمام عمارتوں کے آڈٹ کے بارے میں سوچ رہا ہے ، کل دہلی حادثے پرسماعت۔

دہلی کے ستیہ نکیتن علاقے میں پی جی عمارت گرنے کا معاملہ اب سپریم کورٹ میں اسٹیٹس رپورٹ کے ساتھ پہنچ گیا ہے۔ اس معاملے کے ایمکس کیوری(مشیر عدالت ) اجیت سنہا نے عدالت میں ایک رپورٹ داخل کر کے تمام پی جی اور پرائیویٹ ہاسٹلوں کی جانچ کرانے کا مطالبہ کیا ہے۔ انہوں نے کہا کہ اس علاقے میں بار بار حادثہ ہونا تشو یش کی بات ہے۔ اس پر عدالت نے کہا کہ وہ صرف دہلی نہیں بلکہ پورے ملک میں اس طرح کی عمارتوں کے آڈٹ کے بارے میں غور کر رہی ہے۔ عدالت کو یہ بھی بتایا گیا کہ اس معاملے میں دہلی ہائی کورٹ نے بھی نوٹس لے لیا ہے۔ اس پر سپریم کورٹ نے کہا کہ ممکن ہےکہ وہ دہلی ہائی کورٹ میں لسٹ معاملے کو بھی اپنے یہاں منگوالے اور اس پر سماعت کرے۔ اس کے بعد عدالت نے ستیہ نکیتن معاملے میں پٹیشن کی سماعت کیلئے ۱۰؍ ستمبر کی تاریخ مقرر کردی۔ 

یہ بھی پڑھئے: امریکہ، جنوبی کوریا اور جاپان نے ۵؍ روزہ مشترکہ فوجی مشقوں کا آغاز کیا

واضح رہےکہ سپریم کورٹ نے اس سے قبل بھی ایسی ہی عمارتوں کے معاملات پر غور کرنے کیلئے اجیت سنہا کو مشیر عدالت مقرر کیا تھا۔ سنہا نے منگل کو ہونے والی سماعت میں دہلی کی ستیہ نکیتن علاقے کی عمارت کا معاملہ بھی جوڑ دیا اور اس پر اسٹیٹس رپورٹ پیش کی۔ رپورٹ میں سفارش ہے کہ دہلی کے تمام کالجوں اور یونیورسٹیوں کے آس پاس بنے پی جی، پرائیویٹ ہاسٹل اور طلبہ کے رہنے کی جگہوں کا مکمل سیکوریٹی آڈٹ کرایا جائے۔ رپورٹ میں یہ بھی بتایا گیا ہے کہ ستیہ نکیتن علاقے میں ایسے واقعات پہلے بھی پیش آ چکے ہیں، جیسے اپریل ۲۰۲۲ء میں بھی ایک عمارت گری تھی۔ جانچ میں عمارت کا نقشہ، تعمیر کا معیار، بیسمنٹ کا استعمال کیسے ہو رہا ہے، ڈھانچہ کتنا مضبوط ہے، آگ سے بچاؤ کے انتظامات اور ہنگامی صورتحال میں عمارت سے باہر نکلنے کے راستے جیسی چیزوں کا باریک بینی سے جائزہ لیا جائے گا۔