سی بی آئی افسر ایس آر سنگھ نے عدالت کو بتایا کہ بر آمد شدہ ہتھیار اور قتل کی تفتیش کی گئی لیکن کارتوسوں کی معلومات جمع نہیں کی گئی

ڈاکٹر نریندر دابھولکر کے قتل کے سلسلہ میں سی بی آئی کے ایک تفتیشی افسر نے پونے سیشن کورٹ کی خصوصی عدالت میں مقدمہ سے متعلق ہونے والی سماعت کے دوران ایک سنسنی خیز انکشاف کیا ہے ۔ افسر نے کورٹ کے روبرو اس بات کا اعتراف کیا کہ نریندر دابھولکر پر ملزمین نے جو گولیاں داغی تھیں ، وہ گولیاں جس کارخانےمیں بنائی گئی ہیں ، اس کارخانہ سے گولیاں باہر کیسے آئیں اس تعلق سے کوئی تفتیش نہیں کی گئی ہے۔ 
  توہم پرستی کے خلاف آواز بلند کرنے والے ڈاکٹر نریندر دابھولکر کے قتل سے متعلق پونے کی خصوصی عدالت میں جاری سماعت کےد وران تفتیشی ایجنسی سی بی آئی کے افسر ایس آر سنگھ نے کورٹ کو بتایا کہ ’’ دابھولکر کو قتل کرنےکے لئے ۲۰؍ اگست ۲۰۱۳ء کو جن کارتوسوں کا استعمال کیا گیا تھا وہ کھڑکی کے داروگولا کارخانے میں بنائی گئی تھیں۔ افسر  نے اس  بات کا اعتراف کیا کہ ملزمین سے برآمد کئے گئے ہتھیار اور قتل کے تعلق سے تو تفتیش کی گئی لیکن قتل کے لئے جن کارتوسوں کا استعمال کیا گیا ، وہ کارتوس جہاں بنائے گئے تھے اس جگہ کی جانچ نہیں کی گئی۔ نہ ہی معلوم کرنے کی کوشش کی گئی کہ کارخانہ سے کارتوس ملزمین تک کیسے پہنچے ۔ 
 واضح رہے کہ مذکورہ بالا کیس میں ڈاکٹر وریندر سنگھ تاؤڑے،سچن آندورے ،شرد کالسکر ، وکیل سنجیو پونیکر اور وکرم بھاوے کو ملزم بنایا گیا ہے لیکن اب تک ان پر فرد جرم عائد نہیںکیا گیا ہے۔دوران سماعت افسر نے کورٹ کو یہ بھی بتایا کہ اب تک اس کیس کے سلسلہ میں ۷؍ گواہوں کے بیان درج کئے جاچکے ہیں لیکن ان ۷؍ گواہوں کا میرے پاس کوئی دستاویزی ریکارڈ نہیں ہے ۔کورٹ نےافسر کی فراہم کردہ تفصیلات کو سننے کے بعد سماعت کو ۵؍ ستمبر تک کے لئے ملتوی کر دیا ہے ۔
  یاد رہے کہ نریندر دابھولکر کا قتل ۱۹؍ اگست ۲۰۱۳ء کو ہوا تھا۔ چونکہ وہ توہم پرستی اور تنتر منتر کے خلاف مہم چلایا کرتے تھے اوراس کیلئے انہیںدھمکیاں بھی دی جا چکی تھیں اس لئے  اس  بات کا پختہ امکان تھا کہ قتل میں ہندوتوا وادی تنظیموںکا ہاتھ ہے۔ لیکن ۱۰؍ سال بعد بھی اس قتل کی تفتیش میں پولیس کسی واضح نتیجے پر نہیںپہنچی ہے۔ اب تک قتل کی وجہ اور سازش کرنے والوں کے نام سامنے نہیں آئے ہیں۔