مرکزی حکومت نے سائبر جرائم، مالی فراڈ اور صارفین کے استحصال کے خلاف بڑی کارروائی کرتے ہوئے ۳۷۱۸؍موبائل ایپلی کیشنز کو بلاک کر دیا ہے۔ ان میں بڑی تعداد میں غیر قانونی لون ایپس بھی شامل ہیں، جو مبینہ طور پر لوگوں کو فوری قرض دینے کے نام پر دھوکہ دہی، ہراسانی اور مالی استحصال میں ملوث تھیں۔

 مرکزی حکومت نے سائبر جرائم، مالی فراڈ اور صارفین کے استحصال کے خلاف بڑی کارروائی کرتے ہوئے  ۳۷۱۸؍موبائل ایپلی کیشنز کو بلاک کر دیا ہے۔ ان میں بڑی تعداد میں غیر قانونی لون ایپس بھی شامل ہیں، جو مبینہ طور پر لوگوں کو فوری قرض دینے کے نام پر دھوکہ دہی، ہراسانی اور مالی استحصال میں ملوث تھیں۔ حکومت کی اس کارروائی کا مقصد ایسی موبائل ایپس کے ذریعے ہونے والے سائبر فراڈ، غیر قانونی قرض کی وصولی، ذاتی معلومات کے غلط استعمال اور مالی جرائم پر قابو پانا ہے۔

یہ بھی پڑھئے:کرسٹیانو رونالڈو اور جارجینا روڈریگز نے پرتگال میں شادی کرلی

حکومت اور متعلقہ سیکوریٹی اداروں کو ایسی متعدد ایپس کے بارے میں شکایات موصول ہوئی تھیں جو صارفین کو انتہائی آسان شرائط پر فوری قرض دینے کا دعویٰ کرتی تھیں۔ قرض حاصل کرنے کے بعد کئی صارفین سے مبینہ طور پر بھاری سود، اضافی فیس اور دیگر غیر واضح چارجز وصول کیے جاتے تھے۔
بعض معاملات میں ایسی ایپس صارفین کے موبائل فون سے  کانٹیکٹس، تصاویر اور دیگر ذاتی معلومات  تک رسائی کرکے قرض کی رقم کی واپسی کے لیے صارفین اور ان کے جاننے والوں کو ہراساں کرنے کی کوشش کرتی تھیں۔ حکومت کی جانب سے موبائل ایپس کو بلاک کرنے کی کارروائی اس وسیع مہم کا حصہ ہے جس کا مقصد ملک میں بڑھتے ہوئے ڈجیٹل فراڈ اور آن لائن مالی جرائم کو روکنا ہے۔
حکام صارفین کو مسلسل مشورہ دے رہے ہیں کہ وہ کسی بھی نامعلوم یا غیر مصدقہ ایپ کو اپنے موبائل میں انسٹال نہ کریں اور خاص طور پر ایسی ایپس سے محتاط رہیں جو غیر معمولی طور پر آسان شرائط پر قرض دینے کا وعدہ کرتی ہیں۔ ماہرین کے مطابق کسی بھی لون ایپ کو استعمال کرنے سے پہلے اس کے بارے میں مکمل معلومات حاصل کرنا ضروری ہے۔ صارفین کو ایپ کی اجازتوں، کمپنی کی قانونی حیثیت، قرض دینے والے ادارے اور اس کی شرائط و ضوابط کو اچھی طرح چیک کرنا چاہیے۔

یہ بھی پڑھئے:’’حیوان‘‘ ٹیزر: اکشے کمار کا خطرناک روپ، نابینا سیف علی خان کوجان کا خطرہ

حکومت کی جانب سے ۳۷۱۸؍ ایپس کو بلاک کیا جانا  اس بات کا واضح اشارہ ہے کہ غیر قانونی ڈجیٹل پلیٹ فارمز کے خلاف کارروائی مزید سخت کی جا رہی ہے۔ عوام سے بھی اپیل کی گئی ہے کہ اگر انہیں کسی مشکوک لون ایپ یا آن لائن مالی فراڈ کا سامنا ہو تو متعلقہ حکام کو اس کی اطلاع دیں۔