وزیر اعلیٰ دیویندر فرنویس نے جمعہ کو سائبر بیداری ماہ اکتوبر ۲۰۲۵ء کا افتتاح کیا

 وزیر اعلیٰ دیویندر فرنویس  نے جمعہ کو سائبر بیداری ماہ اکتوبر ۲۰۲۵ء کا افتتاح کیا ۔ پروگرام میں فلم اداکارہ رانی مکھرجی اور اداکا راکشے کمار نے بھی شرکت کی۔اس موقع پروزیراعلیٰ فرنویس نے گولڈن آور کا ذکر کرتے ہوئے کہا کہ ’’جس طرح سڑک حادثے میں اگر زخمی افراد کو ’گولڈن آور ‘ میں اسپتال پہنچایا جائے تو ان کی جان بچائی جا سکتی ہے،اسی طرح سائبر فراڈ کے معاملے میں بھی ’گولڈن آور ‘اہم ہے۔ جتنی جلدی آپ شکایت درج کرائیں گے، خاطی افراد کے خلاف کارروائی کرنا اور دھوکہ  بازی کی رقم کو واپس حاصل کرنا اتنا ہی آسان ہوگا۔ ‘‘انہوںنے عوام سے اپیل کی ہے کہ اگر آپ کو پتہ چلتا ہے کہ آپ سائبر فراڈ کا شکار ہوگئے ہیںتو آپ کو فوری طور پر ہیلپ لائن نمبر  ۱۹۳۰؍  یا  ۱۹۴۵؍پر   شکایت درج کرائیں۔ 
 وزیر اعلیٰ  اور وزیر داخلہ دیویندر فرنویس نے مہاراشٹر پولیس ہیڈ کوارٹر میں ’سائبر بیداری ماہ اکتوبر۲۰۲۵ء‘پروگرام کے افتتاح کے موقع پر سائبر سیکوریٹی کے حوالے سے ایک دستاویزی فلم دکھائی گئی۔ اس کے علاوہ بچوں کیلئے کومک بک ’سائبر یودھا‘ بھی جاری کیا۔ اس موقع پر عوامی آگاہی کیلئے کام کرنے والے سائبر واریئرس کو بھی مبارکباد دی گئی۔ اس پروگرام میں مہمانوںنے بھی اپنے خیالات کا اظہار کیا۔
  اس تقریب میں ڈائریکٹر جنرل آف پولیس رشمی شکلا، محکمہ داخلہ کے ایڈیشنل چیف سیکریٹری اقبال سنگھ چہل ، وی جے ٹی آئی کے ڈاکٹر فاروق قاضی،آئی آئی ٹی ممبئی کے پروفیسر منجیش ہنوال  اور سینئر پولیس افسران موجود تھے۔
 وزیر اعلیٰ فرنویس نے کہا کہ ’’آج کے ڈیجیٹل دور میں سب سے بڑا چیلنج سائبر جرائم کو روکنا، ایسے مجرموں کو سزا دینا اور مالی نقصانات سے بھی بچنا ہے۔ سائبر فراڈ کو روکنے کیلئے اس تعلق سے بیداری اس کا سب سے موثر حل ہے۔ مصنوعی ذہانت ( اے آئی)کے استعمال کی وجہ سے فشنگ، او ٹی پی فراڈ، ڈیپ فیکس، وائس اور فیس کلوننگ جیسی نئی تکنیک کا غلط استعمال کرکے عام لوگوں کو دھوکہ دیا جا رہا ہے۔ ہم سوشل میڈیا، آن لائن لین دین اور ادائیگیوں میں معلومات فراہم کرتے ہیں۔ کوکیز قبول کرنے کے بعد ذاتی معلومات کا غلط استعمال کیا جا سکتا ہے۔ اس سے گھوٹالے، ہفتہ وصولی اور سائبر غنڈہ گردی ہوتی ہے۔
 ریاست میں عالمی معیار کی سائبر سیکوریٹی لیب، رسپانس سینٹرس اور ریگولیٹری میکانزم قائم کئے گئے ہیں جس کی وجہ سے فریب  دہی کے بعد فوری ایکشن لیا جا سکتا ہے ۔