’’کسان چھاتر اور بیمار پریشان، چھتر پور سے ہمیر پور مارگ کا کرو نرمان‘‘کانعرہ لگایا، ضلع کلکٹر سے ملاقات کی کوشش کی

اتر پردیش میں فتح پور میں اسکول میں بنیادی سہولیات کی فراہمی کیلئے احتجاج کے بعد اب ہمیر پور میں جین  الفا نے  اپنی اسکول تک پکی سڑک کیلئے ترنگا لے کر ضلع کلکٹریٹ تک مارچ کیا۔  بچوں نے ہاتھوں میں ترنگا اور مطالبات پر مبنی پوسٹر اٹھا کر ’ترنگا یاترا‘ نکالی اور اپنے والدین اور گاؤں کے بزرگوں کے ساتھ تقریباً ۵؍ کلومیٹر پیدل چل کر ضلع کلکٹریٹ پہنچے۔ 
 بچوں نے کلکٹریٹ کے مرکزی دروازے پر بیٹھ کر’’کسان چھاتر اور بیمار پریشان، چھتر پور سے ہمیر پور مارگ کا کرو رنمان‘‘ کے نعرے لگائے ۔ مظاہرین کا کہنا تھا کہ آزادی کے بعد سے ان کے گاؤں تک مناسب سڑک نہیں بنائی گئی ہے جس کی وجہ سے خصوصاً بارش کے موسم میں اسکول جانے والے بچوں کو شدید مشکلات کا سامنا کرنا پڑتا ہے۔ 
 بارش کے دوران گاؤں کو اسکول اور بیرونی علاقوں سے جوڑنے والا کچا راستہ پانی میں ڈوب جاتا ہے۔ بچوں کے مطابق انہیں کیچڑ اور گندے پانی سے گزر کر اسکول پہنچنا پڑتا ہے، جس سے ان کی اسکول یونیفارم خراب ہوجاتی ہے اور جوتے بھی کیچڑ میں برباد ہوجاتے ہیں۔
 ایک طالب علم نے کہا کہ اس مسئلے کو کئی مرتبہ حکام کے سامنے اٹھایا گیا، لیکن ہر بار انہیں یقین دہانی کرائی گئی کہ ایک یا دو ہفتوں میں سڑک کا کام شروع ہوجائے گا، مگر عملی طور پر کچھ نہیں ہوا۔ بچوں کے ہاتھوں میں موجود پوسٹروں پر بھی سڑک نہ ہونے کی وجہ سے طلبہ، کسانوں اور مریضوں کو درپیش مشکلات کو اجاگر کیا گیا تھا۔