دہلی کے اندرا بھون میں ہریانہ اور مدھیہ پردیش کے نو تقرر شدہ ضلع کانگریس کمیٹی صدور سے کھرگے کا خطاب ،۲۰۲۵ء کو تنظیم سازی کا سال قراردیا

کانگریس صدر ملکارجن کھرگے نے دہلی کے اندرا بھون میں ہریانہ اور مدھیہ پردیش کے نو تقرر شدہ ضلع کانگریس کمیٹی صدور سے خطاب کرتے ہوئے تنظیمی ڈھانچے کو مضبوط بنانے پر زور دیا ۔ انہوں نے کہا کہ کانگریس نے۲۰۲۵ء کو ’تنظیم سازی کا سال‘ قرار دیا ہے اور اس مشن میں ضلع صدور کلیدی حیثیت رکھتے ہیں۔ ان کے مطابق حکومت سازی کے لیے اسمبلی اور لوک سبھا نشستوں پر کامیابی لازمی ہے اور اس مقصد کے لیے ضلع صدور کا کردار فیصلہ کن ہوتا ہے۔
 کھرگے نے واضح کیا کہ ہر ضلع صدر کے ماتحت بلاک، منڈل اور بوتھ سطح کی کمیٹیاں تشکیل پاتی ہیں اور ان میں ایسے کارکن شامل کیے جائیں جو محنتی اور پارٹی کے نظریات کے پابند ہوں۔ انہوں نے کہا، ’’اہم ترین بات یہ ہے کہ ہمارے کارکن کانگریس کی فکر سے نہ بھٹکیں۔ چاہے کوئی انہیں لالچ دے، ان کی وفاداری پارٹی کے ساتھ قائم رہنی چاہئے۔‘‘ کانگریس صدر نے یاد دلایا کہ جب تنظیم مضبوط تھی تو پارٹی نے برسوں ملک پر حکومت کی۔ اس وقت روایت تھی کہ کسی وزیر کے ضلع دورے کے دوران سب سے پہلے ضلع صدر سے ملاقات اور دفتر کا دورہ لازمی ہوتا لیکن وقت کے ساتھ یہ روایت ٹوٹ گئی اور ذاتی پسند پر عہدے بانٹے گئے جس سے اہلیت اور نظریہ پس منظر میں چلا گیا۔ انہوں نے کہا کہ انہوں نے اور راہل گاندھی نے ذاتی طور پر محسوس کیا ہے کہ تنظیم کو مستحکم کیے بغیر اور ضلع صدور کو اہمیت دیے بغیر اقتدار میں واپسی ممکن نہیں۔
 کھرگے نے کہا کہ پارٹی کو عوام کے درمیان مسلسل متحرک رہنا ہوگا ۔ مختلف پروگرا موں کے ذریعے عوام کو جوڑنا اور انہیں پارٹی نظریات سے قریب کرنا ہوگا تاکہ زمینی سطح پر تنظیم کی طاقت بڑھے ۔ کارکنوں کے حوصلے بلند رکھنا، ان کا احترام کرنا اور ان کے دکھ سکھ میں شریک ہونا بھی ضروری ہے    ۔ انہوں نے ہریانہ کے الیکشن کی مثال دیتے ہوئے کہا ’’ ہم صرف۸؍ نشستوں سے ہارے۔ اگر ہمیں ان پر۲۲؍ ہزار سے کچھ زائد ووٹ مل جاتے تو آج ہریانہ میں ہماری حکومت ہوتی۔‘‘ 
 مدھیہ پردیش کا ذکر کرتے ہوئے کہا کہ تقریباً۲۷؍ نشستوں پر ووٹوں میں گڑبڑ ہوئی ۔ محض چند ماہ میں لاکھوں نئے ووٹ بڑھے جس کی تفصیلات راہل گاندھی نے کرناٹک کی مہادیوپورہ سیٹ کے حوالے سے پیش کی تھیں۔