ممبئی پولیس کے اینٹی نارکوٹکس سیل نے داؤد ابراہیم سے منسلک ایک مبینہ ڈرگ سنڈیکیٹ کا پردہ فاش کیا ہے، جسے سلیم ڈولا چلاتا تھا۔ اس کیس میں اُس کے بیٹے طاہر ڈولا کے بیانات کے بعد شردھا کپور، نورا فتحی، سدھارتھ کپور اور دیگر مشہور شخصیات کے نام سامنے آئے ہیں۔

انڈر ورلڈ گینگسٹر داؤد ابراہیم سے منسلک مبینہ ڈرگ پارٹیوں کی تحقیقات میں بالی ووڈ کی مشہور شخصیات شردھا کپور، نورا فتحی اور کئی دوسرے فنکاروں کے نام سامنے آئے ہیں۔ ممبئی پولیس کے اینٹی نارکوٹکس سیل نے حال ہی میں ایک بڑے ڈرگ سنڈیکیٹ کا انکشاف کیا ہے، جس کے سربراہ سلیم ڈولا کو داؤد ابراہیم کا قریبی ساتھی سمجھا جاتا ہے۔ انڈیا ٹوڈے کی رپورٹ کے مطابق سلیم ڈولا دبئی سے اس سنڈیکیٹ کو چلا رہا تھا۔ اس کے بیٹے طاہر ڈولا، جسے اگست میں متحدہ عرب امارات سے بھارت کے حوالے کیا گیا تھا، نے تفتیش کے دوران اہم معلومات فراہم کی ہیں۔ اشاعت کے ذریعے حاصل دستاویزات کے مطابق طاہر نے دعویٰ کیا ہے کہ متعدد بالی ووڈ اداکار، ماڈلز، ریپرز، فلمساز اور حتیٰ کہ داؤد ابراہیم کے چند رشتہ دار بھی اس کی جانب سے ہندوستان اور بیرون ملک منعقد کی جانے والی ڈرگ پارٹیوں میں شرکت کرتے رہے ہیں۔
دستاویزات میں شامل الزامات کے مطابق، نورا فتحی، شردھا کپور اور ان کے بھائی سدھارتھ کپور بھی ان پارٹیوں میں شریک ہوئے۔ ریمانڈ کاپی میں لکھا ہے کہ ’’مذکورہ ملزم نمبر ۵؍ کی مزید تفتیش سے انکشاف ہوا ہے کہ وہ ملک اور بیرون ملک منشیات کی پارٹیاں منعقد کرتا ہے اور ان پارٹیوں کو منشیات فراہم کرتا ہے۔‘‘ مزید کہا گیا ہے کہ ’’مذکورہ ملزم اس سے قبل علیشا پارکر، نورا فتحی، شردھا کپور، سدھارتھ کپور، ذیشان صدیقی، اوری عرف اورہان، عباس مستان، لوکا اور دیگر کئی افراد کے ساتھ ملک اور بیرون ملک ایسی پارٹیوں کا اہتمام کر چکا ہے اور ان میں شامل بھی رہا ہے۔‘‘
ممبئی کرائم برانچ ممکنہ طور پر اب ان تمام اداکاروں اور دیگر مشہور شخصیات کو طلب کرے گی تاکہ وہ اپنے بیانات ریکارڈ کرا سکیں۔ ابھی تک نہ شردھا کپور، نہ نورا فتحی اور نہ ہی ان کی ٹیموں کی جانب سے اس معاملے پر کوئی باضابطہ ردعمل سامنے آیا ہے۔ کیس کی مزید تفصیلات کا انتظار ہے۔ دلچسپ بات یہ ہے کہ شردھا کپور نے ۲۰۱۷ء کی فلم ’’حسینہ پارکر‘‘ میں داؤد ابراہیم کی بہن حسینہ پارکر کا کردار ادا کیا تھا، جبکہ ان کے بھائی سدھارتھ کپور نے اسی فلم میں داؤد کا کردار نبھایا تھا۔