باکس آفس پر مسلسل ناکامیوں کے بعد ٹائیگر شروف نے فلم ساز رام مادھوانی اور پروڈیوسر مہاویر جین کے ساتھ نئی فلم ’’وجرا‘‘ کا اعلان کیا ہے۔ اس روحانی ایکشن فلم کی شوٹنگ اسی سال شروع ہوگی جس کا بڑا حصہ جاپان میں شوٹ ہوگا۔

ٹائیگر شروف نے کمزور باکس آفس کارکردگی کے بعد ایک پرجوش پروجیکٹ کے ذریعے واپسی کا فیصلہ کیا ہے۔ فلم کا عنوان ’’وجرا‘‘ رکھا گیا ہے، جسے ایک ’’روحانی ایکشن یونیورس‘‘ قرار دیا جا رہا ہے۔ فلم کی ہدایت کاری رام مادھوانی کریں گے جبکہ پروڈکشن کی ذمہ داری مہاویر جین نبھائیں گے۔ ذرائع کے مطابق: ’’فلم کا نام وجرا ہے۔ بنانے والوں اور ٹائیگر کو محسوس ہوتا ہے کہ یہ عنوان کہانی کے مزاج اور ہندوستانی ثقافتی جڑوں کی عکاسی کرتا ہے۔‘‘فلم کو ایک ایسے بیانیے کے طور پر پیش کیا جا رہا ہے جو ہائی آکٹین ایکشن کو فلسفیانہ اور روحانی تہوں کے ساتھ جوڑتا ہے۔

ذرائع کا کہنا ہے کہ ’’وجرا‘‘ میں ٹائیگر شروف ایک ایسے اوتار میں نظر آئیں گے جو پہلے کبھی نہیں دیکھا گیا۔ وہ جذباتی گہرائی کے ساتھ خام طاقت کو یکجا کریں گے۔‘‘ کہا جا رہا ہے کہ یہ فلم صرف ایکشن تک محدود نہیں ہوگی بلکہ کردار کے داخلی سفر اور ثقافتی علامتوں کو بھی دریافت کرے گی۔ذرائع کے مطابق یہ پروجیکٹ نہ صرف ہندوستانی ناظرین بلکہ عالمی مارکیٹ اور ہندوستانی ڈائسپورا کو بھی ہدف بنائے گا۔یہ ایک روحانی ایکشن تھریلر ہے۔ ہندوستانی سنیما میں اس نوعیت کا امتزاج پہلے نہیں آزمایا گیا۔‘‘

یہ بھی پڑھئے: ٹائیگر شروف نے کرن جوہر کے سامنے اپنے درد کا اظہار کیا

فلم کی شوٹنگ ۲۰۲۶ء کی دوسری سہ ماہی میں فلور پر جائے گی اور اس کا بڑا حصہ جاپان میں شوٹ کیا جائے گا، جو کہ فلم کے بصری انداز کو ایک منفرد بین الاقوامی رنگ دے گا۔ اطلاعات کے مطابق ٹائیگر اس فلم کے لیے سخت جسمانی اور ذہنی تربیت حاصل کریں گے۔ ایکشن سکوینسز کے ساتھ ساتھ جذباتی مناظر پر بھی خصوصی توجہ دی جا رہی ہے۔ یاد رہے کہ ٹائیگر شروف کی آخری ریلیز ’’باغی ۴‘‘ تجارتی اور تنقیدی طور پر ناکام رہی تھی، جس کے بعد ان کے کریئر کی سمت پر سوالات اٹھنے لگے تھے۔ ’’وجرا‘‘ کو ان کے لیے ایک اہم موڑ سمجھا جا رہا ہے، ایک ایسی فلم جو انہیں روایتی ایکشن ہیرو کے خانے سے نکال کر زیادہ تہہ دار اور سنجیدہ کرداروں کی طرف لے جا سکتی ہے۔