مرکزی حکومت نے یو پی آئی ٹرانزیکشن پر ۲؍ دن بعد نافذ ہونے والے مرچنٹ ڈسکاؤنٹ ریٹ یعنی  ایم ڈی آر کو دیوالی کے بعد تک موخرکردیا ہے۔

مرکزی حکومت نے یو پی آئی ٹرانزیکشن پر ۲؍ دن بعد نافذ ہونے والے مرچنٹ ڈسکاؤنٹ ریٹ یعنی  ایم ڈی آر کو دیوالی کے بعد تک موخرکردیا ہے۔ کہا جارہا ہے کہ حکومت کا یہ فیصلہ تاجروں کی جانب سےمسلسل احتجاج اور یوپی آئی کے بائیکاٹ کی دھمکیوں کے تناظر میں آیا ہے۔ دراصل مرکزی حکومت نے ۲؍ ہزار روپے سے زیادہ کے یو پی آئی لین دین پر۰ء۴؍ فیصد کا مرچنٹ ڈسکاؤنٹ ریٹ طے کیا ہے اور یہ کل ۱۵؍ اکتوبر سے نافذ ہونے والا تھا لیکن اب اسے تقریباً ۲۰؍ دن کیلئے موخر کردیا گیا ہے۔

یہ بھی پڑھئے: جنتر منتر کو ’’ڈی نوٹیفائی‘‘ کرنے کیخلاف عرضیوں پرکل سپریم کورٹ میں سماعت

واضح رہے کہ یو پی آئی اینڈ سروسز اسٹیئرنگ کمیٹی نےفیصلہ کیا کہ تہواروں کے موسم کو مدنظر رکھتے ہوئے پرسن ٹو مرچنٹ (پی ٹوایم) یو پی آئی لین دین پر ایم ڈی آر کو دیوالی کے بعد نافذ کیا جائیگا۔ اس کے نفاذ کی تاریخ کے بارے میں الگ سے اطلاع دی جائے گی۔ 

یہ تہواروں کے موسم میں تاجروں کیلئے بڑی راحت ہے، کیونکہ ان کے لئے دیوالی، دسہرہ اور نوراتری سمیت دیگر تہواروں پر بازار میں تجارت کا سب سے بڑا موقع ہوتا ہے۔ یاد رہے کہ چیمبر آف ٹریڈ اینڈ انڈسٹری کی جانب سے بھی کاروبار کو پہنچنے والے شدید نقصان کا حوالہ دیتے ہوئے اسے ملتوی کرنے کا مطالبہ کیا جا رہا تھا۔