فلسطین کے صدر محمود عباس نے مستقبل کی فلسطینی ریاست کے لئے ایک عبوری آئین تیار کرنے کے لئے کمیٹی تشکیل دینے کا حکم نامہ جاری کر دیا۔

فلسطینی اتھاریٹی کے صدر محمود عباس نے مستقبل کی فلسطینی ریاست کے لئے ایک عبوری آئین تیار کرنے کے لئے کمیٹی تشکیل دینے کا حکم نامہ جاری کر دیا۔ اسرائیلی مخالفت کے باوجود تنظیم حکومت کرنے کا ارادہ رکھتی ہے۔
 وفا نیوز ایجنسی کی طرف سے جاری کردہ ایک بیان کے مطابق یہ اقدام غزہ پر اسرائیل کی جنگ کے خاتمے، غزہ سے اسرائیلی افواج کے انخلاء اور مستقبل میں فلسطینی ریاست کی قیادت سنبھالنے کی کوششوں کے بعد عام انتخابات کی تیاری کے لئے کیا گیا ہے۔یہ ستمبر میں اقوام متحدہ کی جنرل اسمبلی کے سربراہی اجلاس کی تیاری کے لئے بھی ہے جب فرانس، برطانیہ اور کنیڈانے کہا ہے کہ وہ فلسطینی ریاست کو باضابطہ طور پر تسلیم کرنے کا ارادہ رکھتے ہیں جس کی اسرائیل اور امریکہ نے مذمت کی ہے۔
 بیان میں کہا گیا ہے کہ کونسل کے اراکین میں قومی، سیاسی اور کمیونٹی شخصیات کے ساتھ ساتھ قانونی اور آئینی ماہرین بھی شامل ہوں گے جو سول سوسائٹی اور صنف کی نمائندگی کو مدنظر رکھیں گے۔
 مصر نے اعلان کیا ہے کہ اگر جنگ بندی ہوتی ہے تو غزہ کا نظام عارضی طور پر۱۵؍ فلسطینی ٹیکنوکریٹس چلائیں گے۔مصری وزیرخارجہ کی جانب سے جاری بیان میں کہا گیا ہے کہ غزہ کا انتظامیہ فلسطینی اتھاریٹی کی نگرانی میں کام کرے گا۔انتظامیہ کی مدت ۶؍ماہ مقرر ہو گی جس میں غزہ اور مقبوضہ مغربی کنارے کے انتظامی اتحاد پر زور دیا جائے گا۔قاہرہ میں پریس کانفرنس سے خطاب کرتے ہوئے وزیرخارجہ نے کہا کہ اصل تجویز پر واپس جانا ہے جس میں۶۰؍ دن کی جنگ بندی، کچھ اسیران اور کچھ فلسطینی قیدیوں کی رہائی اور غزہ میں انسانی اور طبی امداد کی بغیر کسی رکاوٹ یا شرائط کے داخلے شامل ہے۔