مرکزی وزیر نتن گڈکری نے اس تعلق سے معلومات دی ،پاس ۱۵؍ اگست سے دستیاب ہوگا اورایک سال یا ۲۰۰؍ ٹرپ مکمل ہونے تک قابل قبول ہوگا

سڑک ٹرانسپورٹ اور شاہراہوں کی وزارت نے ٹول پلازوں پر بڑھتے ہوئے تنازعات اور ہجوم کو کم کرنے اور بغیر کسی رکاوٹ کے سفر کو یقینی بنانے کے مقصد سے نجی گاڑیوں کیلئے ۳؍ ہزار روپے کا فاسٹ ٹیگ پر مبنی سالانہ پاس شروع کرنے کا فیصلہ کیا ہے۔ سڑک ٹرانسپورٹ اور شاہراہوں کے وزیر نتن گڈکری نے بدھ کو خود یہ معلومات دیں ۔ یہ پاس آئندہ ۱۵؍ اگست سے دستیاب ہوگا اور فعال ہونے کی تاریخ سے ایک سال تک یا ۲۰۰؍ٹرپ تک جو بھی پہلے ہو، اس کیلئے ویلیڈرہے گا۔
 نتن گڈکری نے ایک سوشل میڈیا پوسٹ میں کہا’’ایک تاریخی اقدام کے تحت ۱۵؍ اگست ۲۰۲۵ء  سے۳؍ ہزار  روپے کی قیمت والا فاسٹ ٹیگ پر مبنی سالانہ پاس شروع کیا جا رہا ہے۔ یہ پاس فعال ہونے کی تاریخ سے ایک سال تک یا۲۰۰؍ ٹرپ تک  جو بھی پہلے ہو، قابل قبول رہے گا۔ یہ پاس صرف غیر تجارتی نجی گاڑیوں (کار، جیپ، وین وغیرہ) کے لیے خاص طور پر تیار کیا گیا ہے اور یہ ملک بھر کی قومی شاہراہوں پر بغیر کسی رکاوٹ کے سفر کو ممکن بنائے گا۔‘‘
  انہوں نے کہا کہ پاس کے تجدید کے عمل کو آسان اور ہموار بنانے کے لیے جلد ہی شاہراہ سفر ایپ اور قومی شاہراہ کی ویب سائٹ پر اس کے لیے ایک الگ لنک فراہم کی جائے گی ۔
 گڈکری نے کہا کہ یہ پالیسی ۶۰؍ کلومیٹر کے دائرے میں واقع ٹول پلازوں سے متعلق طویل عرصے سے چلی آ رہی تشویش کا خاتمہ  کرے گی اور ایک ہی آسان لین دین کے ذریعے ٹول ادائیگی کو ہموار بنائے گی۔
  انہوں نے کہا کہ سالانہ پاس پالیسی انتظار کے وقت کو کم کرنے ،  ٹریفک کا بوجھ کم کرنے اور ٹول پلازوں پر تنازعات کو ختم کر نے، لاکھوں نجی گاڑیوں کے ڈرائیوروںکو تیز، ہموار اور بہتر سفر کا تجربہ فراہم کرنے کیلئے بنائی گئی ہے۔
 قابل ذکر ہے کہ موجودہ وقت میں جو مسافر ٹول پلازہ سے گزرتے ہیں، وہ ایڈریس پروف اور دستاویز جمع کر کے ماہانہ پاس حاصل کر سکتے ہیں۔ ان پاس کی قیمت ۳۴۰؍روپے ماہانہ ہے جو سالانہ ۴۰۸۰؍ روپے تک ہوتا ہے۔ اس طرح دیکھا جائے تو  سالانہ ۳؍ ہزار  روپے کا پاس گاڑی مالکان کیلئے فائدہ مند ثابت ہونے والا ہے۔