فلسطینی مندوب نےمتنبہ کیا کہ اسرائیل کو روکا جائے ورنہ ہم روکیں گے

مسجد اقصیٰ میں اسرائیلی وزیر کے داخلے پر  اقوام متحدہ کی سلامتی کونسل کے بلائے گئے ہنگامی اجلاس میں نہ صرف وہاں کے حالات پر کھل کر گفتگو ہوئی بلکہ اس دوران اسرائیل کی حرکت کی  سرزنش بھی کی گئی اور فلسطینی نمائندے کی جانب سےاسرائیل پر سخت تنقیدیں کی گئیں۔  اس موضوع پر بحث کے بعد جو قرار داد منظور کی گئی اس میں اسرائیل سے شرانگیزی بند کرنے اور حالات کو جو ں کے توں برقرار رکھنے کی اپیل کی گئی لیکن اسرائیلی وزیر کے خلاف کیا کارروائی کی جائے گی اس پر قرار داد میں خاموشی اختیار کرلی گئی ۔
  اس سے قبل مسجد اقصیٰ میں صہیونی سخت گیر وزیر کے  داخل ہونے پر اقوام متحدہ کی سلامتی کونسل نے ہنگامی اجلاس طلب کیا تھا جس  میں شریک فلسطینی مندوب اسرائیل کی دیدہ دلیری اور اقوام عالم کی بے حسی پر پھٹ پڑے اور عالمی برادری کو اس کے متعصبانہ رویے  پر آئینہ دکھا دیا۔ فلسطینی مندوب ریاض منصور نے سلامتی کونسل کے  ہنگامی اجلاس میں اقوام عالم کو مخاطب کرتے ہوئے کہا کہ ہمارے صبر کو  ہماری کمزوری نہ سمجھا جائے۔ مسجد اقصیٰ کے تقدس کا خیال رکھا جائے۔ انہوں  نے دوٹوک الفاظ میں کہا کہ اگر سیکوریٹی  کونسل نے اسرائیل کو نہ روکا تو  پھر فلسطین اپنے طریقے سے روکے گا۔ انہوں نے پوچھا کہ اسرائیل کی جانب سے اب کس نئی خلاف ورزی کا انتظار کیا جارہا ہے ؟ وہ کون سی سرخ لکیر ہے  جو اسرائیل کو روک سکے۔  اسرائیل  ہر عالمی قانون کی دھجیاں اڑاتا ہے لیکن اس کے خلاف اب تک کوئی کارروائی نہیں ہوئی ہے۔ اسے صرف انتباہ دے کر چھوڑ دیا جاتا ہے۔ اس مرتبہ بھی وہی ہونے کا امکان ہے لیکن اب ہم واـضح کردینا چاہتے ہیں کہ اسرائیل کو ہم اپنی طرح سے سبق سکھائیں گے ۔