امریکی صدر جوبائیڈن کا اظہار تشویش، کہا کہ ’’امریکہ میں اس وقت کچھ بہت ہی خطرناک ہورہاہے۔‘‘

امریکی صدر جو بائیڈن نے اپنے حریف ڈونالڈ ٹرمپ پر نکتہ چینی کرتے ہوئے کہا کہ فی الوقت امریکہ میں کچھ بہت ہی خطرناک ہو رہا ہے۔ سابق صدر ڈونالڈ ٹرمپ ریپبلکن پارٹی میں صدارتی امیدوار نامزد ہونے کی دوڑ میں اپنے دیگر حریفوں کے مقابلے میں سب سے آگے ہیں۔ 
اس پر تشویش کااظہار کرتے ہوئے جمعرات کو ایریزونا میں خطاب کے دوران بائیڈن نے ٹرمپ کے حامیوں پر قانون کی حکمرانی، آزاد صحافت اور جمہوریت پر حملہ کرنے کا الزام لگایا۔بائیڈن نے کہاکہ جمہوریتوں کیلئے مرنے کیلئے رائفل ضروری نہیں ہے، وہ اس وقت مر سکتی ہے، جب لوگ خاموش ہو جاتے ہیں ، جب وہ کھڑے ہونے میں ناکام رہتے ہیں یا جمہوریت کو لاحق خطرات کی مذمت نہیں کرتے، کیونکہ لوگ مایوس، تھکا ہوا اور الگ تھلگ محسوس کرنے کے سبب، جو چیز اپنے لیے سب سے قیمتی ہوتی ہے، اسی کو کھو دینے کے لیے تیار ہو جاتے ہیں ۔ یاد رہے کہ سابق صدر ٹرمپ نے نعرہ دیا تھا ہے، `میک امریکہ اگین گریٹ(ایم اے جی اے) یعنی امریکہ کو دوبارہ عظیم بنائیں ۔ بائیڈن نے اس نعرے کا حوالہ دیتے ہوئے کہا کہ اس پر اب کوئی سوال نہیں ہے کہ آج کی ریپبلکن پارٹی کو ایم اے جی اے کے انتہا پسند چلارہے ہیں اور اسے ڈرا دھمکا بھی رہے ہیں ۔ جس تقریب سے بائیڈن خطاب کر رہے تھے وہ ان کے مرحوم دوست اور سیاسی حریف نیز ریپبلکن پارٹی کے اندر ٹرمپ کے سخت ناقد سینیٹر جان مکین کے اعزاز میں تھی۔