امریکی صدر ڈونالڈ ٹرمپ نے کہا ہے کہ اگر ایران نے اپنا جوہری پروگرام دوبارہ شروع کیا تو واشنگٹن اس بار زیادہ انتظار نہیں کرے گا، فوری کارروائی کرے گا۔ وہ اتوار کی شب امریکی بحریہ کی ۲۵۰؍ویں سالگرہ کے موقع پر نورفولک نیول بیس میں خطاب کر رہے تھے۔ 

ٹرمپ نے کہا کہ ہم اس بار زیادہ دیر نہیں لگائیں گے، ہماری فوج ایران کے جوہری پروگرام کو پروان چڑھانےکی اجازت نہیں دے گی۔ انہوں نے یاد دلایا کہ رواں سال ۲؍ جون کو ایران کی جوہری تنصیبات پر’بی ٹو‘ بمبار طیاروں اور ٹوماہاک میزائلوں کے ذریعے حملہ کیا گیا تھا۔ان کا کہنا تھا کہ ’بی ٹو‘ بمبار طیاروں نے اپنے ٹھکانوں کو  انتہائی درستگی سے نشانہ بنائے جبکہ ایک آبدوز سے ۳۰؍ ٹوماہاک میزائل بھی داغے گئے تاکہ مشن کامیابی سے مکمل ہو۔

امریکی صدر نے بتایا کہ امریکی افواج نے اس نوعیت کے حملے کے لئے تقریباً ۲۲؍ برس تک تربیت حاصل کی مگر ایسا فیصلہ ماضی کی کسی حکومت نے نہیں کیا۔ انہوں نے کہا کہ ہم نے۲۲؍ سال انتظار کیا مگر اب دوبارہ اتنا طویل انتظار نہیں کریں گے۔ ٹرمپ نے واضح کیا کہ اگر ایران نے جوہری سرگرمیاں دوبارہ شروع کیں تو امریکہ فوری کارروائی کرے گا۔

ادھر ایرانی پاسدارانِ انقلاب کے کمانڈر میجر جنرل محمد باکپور نے کہا ہےکہ ایرانی بحری فورسیز، چاہے سمندر میں ہوں، جزائر پر یا ساحلوں پر، انتہائی اعلیٰ تیاری اور بلند حوصلے کی حامل ہیں۔واضح ہو کہ رواں سال جون میں جب ایران کے ساتھ جوہری مذاکرات کے چھٹے دور کی تیاری ہو رہی تھی، امریکہ نے ایک اچانک حملہ کیا جسے ’نصف شب کا ہتھوڑا ‘کے نام سے شروع کئے گئے اس آپریشن میں ایران کی اہم ترین جوہری تنصیبات کو پوری طاقت سے نشانہ بنایا گیا تھا۔