موڈیز نے امریکہ کو اے اے اے درجہ بندی سے ہٹا دیا ہے۔ موڈیز کا فیصلہ فچ ریٹنگز کے بعد آیا۔

جمعہ کو موڈیز ریٹنگز نے امریکی کریڈٹ ریٹنگ کواے اے اے سے اے اے وَن تک گھٹا دیا۔ ۱۹۱۷ء کے بعد یہ پہلا موقع ہے جب موڈیز نے امریکہ کو مکمل کریڈٹ اسکور سے انکار کیا ہے۔ اس اقدام نے سرمایہ کاروں کو خبردار کیا ہے کہ امریکہ کا قرض اب پہلے جیسا محفوظ نہیں سمجھا جا سکتا۔ اس سے امریکیوں کیلئے قرض لینا زیادہ مہنگا ہو سکتا ہے کیونکہ شرح سود بڑھ سکتی ہے۔ اس سے ان لوگوں پر اثر پڑ سکتا ہے جو پہلے ہی مہنگائی اور ٹیرف کی زد پر ہیں۔ موڈیز کا فیصلہ فچ ریٹنگز ۲۰۲۳ء اور اورایس اینڈ پی ۲۰۱۱ء کے بعد آیا ہے، جس نے پہلے ہی امریکہ کی درجہ بندی کو کم کر دیا تھا۔ اب تینوں بڑی ریٹنگ ایجنسیاں امریکہ کو اے اے اے سے کم درجہ دیتی ہیں۔ 
یہ فیصلہ کیوں کیا گیا؟
موڈیز نے اپنے بیان میں کہا ہے کہ پچھلی دہائی میں امریکہ کے سرکاری قرض اور سود کی ادائیگی کا تناسب اتنا بڑھ گیا ہے کہ یہ اسی طرح کی ریٹنگ والے دوسرے ممالک سے بہت زیادہ ہے۔ ایجنسی کا اندازہ ہے کہ مستقبل میں امریکہ کی قرض لینے کی ضروریات میں مزید اضافہ ہو گا جس سے معیشت پر طویل مدتی دباؤ پڑے گا۔ موڈیز نے درجہ بندی کو ’مستحکم‘ نقطہ نظر دیا ہے، کیونکہ امریکی فیڈرل ریزرو کی پالیسیوں کو اب بھی مضبوط اور خودمختار سمجھا جاتا ہے اس کے باوجود یہ استحکام خطرے میں پڑ سکتا ہے کیونکہ صدر ڈونالڈ ٹرمپ فیڈرل ریزرو کی آزادی پر سوال اٹھاتے ہیں اور اس کے سربراہ جیروم پاول کو ہٹانے کی دھمکی دیتے ہیں۔ 
کیا اثر پڑے گا؟
ایجنسی کا یہ فیصلہ عام امریکیوں کیلئے مشکلات بڑھا سکتا ہے۔ اگر سرمایہ کار امریکی قرض کو زیادہ خطرناک سمجھتے ہیں تو ٹریژری کی پیداوار بڑھ سکتی ہے۔ اس سے گروی، کار لون اور کریڈٹ کارڈس پر سود کی شرح بڑھ جائے گی۔ ٹرمپ انتظامیہ تخفیف پر زور دے رہی ہے۔ ایلون مسک کی قیادت میں ڈپارٹمنٹ آف گورنمنٹ ایفیشینسی(ڈی او جی ای ) نے ہزاروں سرکاری ملازمین کو فارغ کر دیا ہے اور یو ایس ایڈ جیسی تنظیموں میں تخفیف کی ہیں۔ لیکن ماہرین کا کہنا ہے کہ ٹرمپ کا مجوزہ بل، جس میں ۲۰۱۷ء کی ٹیکس تخفیف کو مستقل بنانا اور میڈیکیڈ جیسے پروگرامس میں کٹوتیاں شامل ہیں، اگلے ۱۰؍ برسوں میں قرض میں ۳ء۳؍ ٹریلین ڈالر کا اضافہ کر سکتا ہے۔