بی جے پی کو چیلنج دیا کہ ’’ اگر ہمت ہے تو جمہوری طریقے سے ہم سے جیت کر دکھائو، ای ڈی کا استعمال بند کرو ‘‘

یہاں ای ڈی کی چھاپہ ماری کے دوران زبردست ڈراما دیکھنے کو ملا ۔ ای ڈی  نے  سیاسی کنسلٹنسی فرم انڈین پولیٹکل ایکشن کمیٹی (آئی-پیک) سے وابستہ مقامات پر ریڈ کی اور چھاپہ کی کارروائی جارہی ہی تھی کہ وہاں وزیر اعلیٰ ممتا بنرجی خود پہنچ گئیں۔ اس کی وجہ سے ای ڈی کے افسران ہکا بکا رہ گئے اور وہاں کافی ڈرامائی صورتحال پیدا ہو گئی تھی ۔ اسی جگہ پر ممتا بنرجی نےپریس کانفرنس کی اور یہ سنگین  الزام لگایا کہ ای ڈی نے ترنمول کانگریس کے پارٹی دفتر سے اہم دستاویزات  چرائی ہیں، یہ کارروائی  سیاسی مقاصد کے تحت کی جارہی ہے۔ ان کے الزامات کے بعد انفورسمنٹ ڈائریکٹوریٹ نے ایک باضابطہ بیان جاری کرتے ہوئے ان دعوؤں کو مسترد کر دیا لیکن یہ ڈراما کافی دیر تک جاری رہا۔ 
 ممتا بنرجی نے مرکزی حکومت اور مرکزی وزیر داخلہ پر بھی سخت حملہ کیا۔ انہوں نے کہا کہ یہ کارروائی انتخابات سے پہلے ترنمول کانگریس کی حکمت عملی، امیدواروں کی فہرست اور اندرونی منصوبہ بندی حاصل کرنے کی کوشش ہے۔ ان کے مطابق مرکز جان بوجھ کر ریاستی حکومت کو بدنام کرنے اور سیاسی دباؤ بنانے کی حکمت عملی پر عمل کر رہا ہے۔ممتا بنرجی نے کہا کہ کیا یہ ای ڈی یا مرکزی وزیر داخلہ کی ذمہ داری ہے کہ وہ کسی سیاسی جماعت کی ہارڈ ڈسک اور امیدواروں کی فہرست  ضبط کرے؟ انہوں نے الزام لگایا کہ ایک ایسا وزیر داخلہ جو ملک کو محفوظ نہیں رکھ پا رہا، ان کی پارٹی کے تمام دستاویزات  چرانے میں مصروف  ہے۔اس  دوران ممتا بنرجی نے بی جے پی کو چیلنج دیا کہ اگر اس میںہمت ہے تو وہ جمہوری طریقے سے ان کا سامنا کرے۔ اس طرح سے بزدلانہ اقدامات کرکے ای ڈی کا استعمال نہ کرے۔