مسجد الحرام اور مشاعر مقدسہ میں  ایسے عازمین کیلئے مختص رہیں گے جنہیں طبی ضروریات کے تحت فوراً اسپتال منتقل کرنا ضروری ہوگا، ۱۳؍ ہیلی پیڈ بنائے گئے

حج کے دوران عازمین کو  ہنگامی طبی سہولیات کی فراہمی کیلئے سعودی عرب کے ادارہ ہلال احمر نے۱۱؍فضائی ایمبولینس طیاروں کو متحرک کر دیا ہے۔ یہ ہیلی کاپٹرس مسجد الحرام اور مشاعر مقدسہ سے ایسے مریضوں کو منتقل کرنے کیلئے مختص رہیں گے جنہیں فوری طور پر اسپتال منتقل کرنا ضروری ہوگا۔ ان  ہیلی کاپٹرس  کیلئے ۱۳؍  ہیلی پیڈ مختلف مقامات پر تیار کئے گئے ہیں تاکہ فوری طبی رسپانس کو یقینی بنایا جا سکے۔
 اس فضائی طبی سروس پر۱۲۰؍ سے زائد ماہر افراد، جن میں تجربہ کار ڈاکٹر اور ایمرجنسی میڈیکل ٹیکنیشین شامل ہیں جو ۲۴؍  گھنٹے ڈیوٹی انجام دے رہے ہیں۔ ان کی خدمات کا مقصد ’’سعودی ویژن۲۰۳۰ء‘‘ کے تحت حجاج کرام کو اعلیٰ معیار کی  سہولیات فراہم کرنا ہے۔
 یہ فضائی ایمبولینس سروس مکہ مکرمہ اور تمام مقدس مقامات پر دستیاب ہوگی تاکہ مریضوں کی بروقت منتقلی اور طبی انخلا کی کارروائیاں مؤثر انداز میں انجام دی جا سکے۔ اس کا مقصد سیکوریٹی اور صحت ٹیموں کی فوری رسائی کو ممکن بنانا ہے خواہ مریض کسی بڑے اجتماع میں ہوں یا کسی اسپتال کے قریب ہوں۔ فضائی ایمبولینس نہ صرف مریضوں اور زخمیوں کو تیزی سے منتقل کرتے ہیں بلکہ مختلف طبی مراکز کے درمیان منتقلی، ماہر طبی ٹیموں کو فوری طور پر حساس یا ہجوم والے مقامات تک پہنچانے میں کلیدی کردار ادا کرتے ہیں۔