نوی ممبئی انٹرنیشنل ایئرپورٹ نے آئندہ موسمِ سرما کے پروازی شیڈول سے قبل مسافروں کی سہولت کے لیے آمدورفت، ٹیکسی، بس، ہوائی اڈوں کے درمیان منتقلی، مختصر قیام اور فضائی خوراک سمیت متعدد خدمات کو مزید وسعت دی ہے۔

نوی ممبئی انٹرنیشنل ایئرپورٹ نے آئندہ موسمِ سرما کے پروازی شیڈول سے قبل مسافروں کی سہولت کے لیے آمدورفت، ٹیکسی، بس، ہوائی اڈوں کے درمیان منتقلی، مختصر قیام اور فضائی خوراک سمیت متعدد خدمات کو مزید وسعت دی ہے۔ ادانی ایئرپورٹ ہولڈنگز لمیٹڈ کے زیر انتظام یہ ہوائی اڈہ ایسے وقت میں اپنی تیاریوں کو مضبوط کر رہا ہے جب ممبئی کے چھترپتی شیواجی مہاراج بین الاقوامی ہوائی اڈے پر گنجائش کے دباؤ کے باعث مزید پروازوں کو نوی ممبئی منتقل کرنے کی تیاری کی جا رہی ہے۔موسمِ سرما کا پروازی شیڈول  ۲۵؍ اکتوبر ۲۰۲۶ ءسے ۲۷ ؍مارچ ۲۰۲۷ء تک جاری رہے گا۔ اسی کے پیش نظر نوی ممبئی انٹرنیشنل ایئرپورٹ پر مسافروں کے لیے نہ صرف آمدورفت کے ذرائع بڑھائے جا رہے ہیں بلکہ ہوائی اڈے کے اندر بہتر رہنمائی، ڈجیٹل فنون اور خصوصی تجرباتی علاقوں کے ذریعے سفر کو زیادہ آرام دہ اور خوشگوار بنانے پر بھی توجہ دی جا رہی ہے۔ مہاراشٹر اسٹیٹ روڈ ٹرانسپورٹ کارپوریشن ۷؍ اکتوبر سے نوی ممبئی انٹرنیشنل ایئرپورٹ سے برقی ’’ای شیوا ئی‘‘ بس سروس شروع کرے گا۔ ابتدائی مرحلے میں یہ بسیں ہوائی اڈے کو دادر، بوریولی اور پونے سے جوڑیں گی۔ نوی ممبئی ایئرپورٹ سے دادر کا کرایہ ۱۷۰؍ روپے، بوریولی کا ۲۱۰ ؍روپے اور پونے کا ۴۵۰ ؍روپے مقرر کیا گیا ہے۔

یہ بھی پڑھئے:سنجے دت کی ’’ہندوستان میں سکون محسوس نہیں ہوتا‘‘ والے بیان پر نئی وضاحت

۱۲ ؍سال سے کم عمر بچوں اور نیشنل کامن موبیلیٹی کارڈ کے ذریعے سفر کرنے والی خواتین کو نصف کرایے کی سہولت دی جائے گی۔ دادر سے آنے والی بس سائن اور اٹل سیتو کے راستے چلے گی جبکہ بوریولی کا راستہ ممبئی ایئرپورٹ کے ٹرمینل ایک، باندرہ اور اٹل سیتو سے منسلک ہوگا۔ پونے کے لیے روزانہ دو خدمات چلانے کا منصوبہ ہے۔ نجی بس سروس ’چالو‘ پہلے ہی روزانہ ۲۱؍ خدمات کے ذریعے نوی ممبئی ایئرپورٹ کو ماروے، باندرہ، دادر اور  قلابہ سے جوڑ رہی ہے۔ نوی ممبئی میونسپل ٹرانسپورٹ بھی ہوائی اڈے کے لیے ۷؍ مخصوص راستوں پر بسیں چلا رہا ہے، جن سے نوی ممبئی کے مختلف علاقوں سے مسافروں کو ٹرمینل تک پہنچنے میں سہولت مل رہی ہے۔
بھارت ٹیکسی ۱۰؍ اکتوبر سے نوی ممبئی ایئرپورٹ پر اپنی خدمات شروع کرے گی اور ابتدائی مرحلے میں ۴۰؍ تک گاڑیاں دستیاب ہوں گی۔ اس کے علاوہ ٹیکسی، رکشا اور کرایے پر گاڑی حاصل کرنے کی سہولتیں بھی مسافروں کے لیے دستیاب کی جا رہی ہیں۔ مسافروں کی سہولت کے لیے نوی ممبئی انٹرنیشنل ایئرپورٹ اور چھترپتی شیواجی مہاراج بین الاقوامی ہوائی اڈے کے درمیان ہر گھنٹے مفت شٹل سروس بھی شروع کی جا رہی ہے۔ سٹی فلو، آریا اور چالو کی جانب سے چلائی جانے والی یہ خدمت دونوں ہوائی اڈوں کے درمیان سفر کرنے والے مسافروں کے لیے براہِ راست منتقلی کا ذریعہ فراہم کرے گی۔

یہ بھی پڑھئے:لیونل میسی اپنے انٹر نیشنل کریئر کاآخری میچ کھیلیں گے

نوی ممبئی انٹرنیشنل ایئرپورٹ کو پنویل، تارگھر اور بامن ڈونگری مضافاتی ریلوے اسٹیشنوں سے جوڑا گیا ہے۔ اس کے علاوہ اٹل سیتو اور سائن-پنویل شاہراہ جیسے اہم راستے بھی ہوائی اڈے تک رسائی کو بہتر بناتے ہیں۔ اس رابطہ نظام سے ممبئی، نوی ممبئی، پونے اور ممبئی میٹروپولیٹن خطے کے مختلف حصوں سے آنے والے مسافروں کو فائدہ پہنچنے کی توقع ہے۔  مسافروں کے مختصر قیام کی ضرورت کو مدنظر رکھتے ہوئے ٹرمینل ایک کے اندر ۸۰؍کمروں پر مشتمل ’سوئرل ٹرانزٹ ہوٹل‘ اکتوبر کے وسط میں شروع کیا جائے گا۔ یہاں مسافروں کو چار گھنٹے کے مختصر قیام سے لے کر رات بھر ٹھہرنے تک کی سہولت ملے گی۔ ہوٹل میں غسل خانے، کام کرنے کی جگہ، وائی فائی اور ۲۴؍ گھنٹے کھانے کی سہولت بھی فراہم کی جائے گی۔