ترک شہری رفعت پریشان ہے کہ اسے ہر کوئی بدنام زمانہ امریکی کاروباری سمجھ کر نفرت و نخوت کا اظہار کررہا ہے۔

ترکی کے ۵۵؍سالہ رفعت اوزدمیر بدنام زمانہ امریکی ارب پتی جیفری ایپسٹین سے غیر معمولی مشابہت کے باعث ذرائع ابلاغ اور سوشل میڈیا پر موضوعِ بحث بن گئے ہیں۔ عوام نے ان دونوں کے درمیان نمایاں مماثلت کو خاصی توجہ دی۔ 
جيفری ایپسٹین، جو یہودی نژاد امریکی ارب پتی اور جنسی جرائم میں سزا یافتہ تھا،۱۹۵۳ء میں پیدا ہوا اور تدریس و بینکاری سرمایہ کاری سمیت مختلف شعبوں سے وابستہ رہا۔ وہ دنیا کے کئی مشہور ستاروں اور سیاست دانوں کے قریب سمجھا جاتا تھا، جن پر کم عمر لڑکیوں پر مشتمل ایک مبینہ نیٹ ورک سے تعلق کے الزامات بھی لگے۔ ایپسٹین کو۲۰۰۸ء میں جنسی جرائم کا مرتکب قرار دیا گیا، جبکہ۲۰۱۹ء میں نیویارک کی جیل میں مزید مقدمے کے انتظار کے دوران مردہ پایا گیا۔ 
امریکی وزارتِ انصاف کی جانب سے ایپسٹین سے متعلق فائلیں جاری ہونے کے بعد ترک شہری رفعت اوزدمیر کی تصویر ترک اور بین الاقوامی سوشل میڈیا پلیٹ فارمز پر تیزی سے وائرل ہوگئی، کیونکہ صارفین نے ان کی شکل و صورت کو ایپسٹین سے غیر معمولی حد تک مشابہ قرار دیا اور تصاویر و تقابلی پوسٹس وسیع پیمانے پر شیئر کی گئیں۔ اوزدمیر نے بتایا کہ سب سے پہلے ان کے بھتیجے نے انہیں اس مشابہت کی طرف متوجہ کیا تھا، جس نے مذاق میں کہا: ’’چچا، آپ جیفری ایپسٹین سے بہت ملتے جلتے ہیں۔ ‘‘
انہوں نے مزید کہا کہ وقت گزرنے کے ساتھ یہ معاملہ ان کے لیے نفسیاتی اور سماجی بوجھ بن گیا، کیونکہ عوامی مقامات پر لوگوں کی حیرت اور ناگواری بھری نظروں کا سامنا کرنا پڑتا ہے۔ اوزدمیر کے مطابق: ’’میں اس شخص کو پہلے جانتا بھی نہیں تھا، پھر سوشل میڈیا اور خبروں کے ذریعے اس کے بارے میں معلوم ہوا۔ میں نہیں چاہتا کہ میرا موازنہ ایسے شخص سے کیا جائے۔ شاید شکل و صورت میں کچھ مماثلت ہو، لیکن یہ یقیناً میری بدقسمتی ہے۔ ‘‘