پڑوسی ملک کیلئے برآمدات میں ۲۵؍ فیصد کا غیر معمولی اضافہ ریکارڈ کیاگیا مگر درآمد بھی بڑھی، نتیجتاً تجارتی خسارہ ۶۴؍ ارب ڈالر تک پہنچ گیا۔
ہندوستان نے چین کے لئے اپنے ایکسپورٹ میں اضافہ تو کردیا ہےلیکن اس کا بڑا فائدہ فوری طور پر نہیں ملے گا۔ تصویر:آئی این این
اپریل سے اکتوبر کے دوران چین کیلئے ہندوستانی برآمدات میں۲۵؍ فیصد کا ریکارڈ اضافہ ہونے کے باوجود چین کے ساتھ تجارتی خسارہ مسلسل بڑھتارہا اور رواں مالی سال کے پہلے ۷؍ مہینوں میں یہ۶۴؍ ارب ڈالر تک پہنچ گیا جو گزشتہ سال اسی مدت میں ۵۷ء۶۵؍ ارب ڈالر تھا۔۲۵-۲۰۲۴ء میں ہندوستان کا مجموعی تجارتی خسارہ ۱۰۰؍ ارب ڈالر کے قریب پہنچتے ہوئے۹۹ء۱۲؍ ارب ڈالر ہوگیا ہے۔
حکومت نے چین کو برآمدات میں حالیہ اضافے کی وجہ امریکی ٹیرف کے اثرات کے بعد برآمدی منڈیوں میں تنوع کو قرار دیا ہے لیکن گزشتہ ۵؍برسوں میں چین کیلئے ہندوستان کی برآمدات (ایکسپورٹ) مجموعی طور پرمسلسل گھٹتی رہی ہیں۔ ۲۱-۲۰۲۰ء سے۲۵-۲۰۲۴ء کے درمیان ہندوستان کی چین کو برآمدات تقریباً ۳۳؍ فیصد کم ہوئیں، جبکہ اسی مدت میں چین سے درآمدات میں تقریباً۷۴؍فیصد اضافہ ہوا۔
چین کیلئے ہندوستان کی جانب سے ایکسپورٹ ہر سال کم ہوتا گیا اور گزشتہ مالی سال یہ ۱۴ء۲۵؍ ارب ڈالر کی کم ترین سطح پر پہنچ گیاتھا۔ رواں مالی سال کے پہلے ۷؍مہینوں(اپریل تا اکتوبر) برآمدات۱۰ء۰۳؍ ارب ڈالر تک پہنچ گئیں۔ ۲۵-۲۰۲۴ء میں چین سے درآمدات میں اضافے کی بنیادی وجہ الیکٹرانکس، ای وی بیٹریوں، سولر سیلز اور صنعتی خام مال کی بڑھتی ہوئی مانگ رہی۔ گلوبل ٹریڈ ریسرچ انیشی ایٹیو کے مطابق چین ۸؍بڑی صنعتی مصنوعات کے تمام زمروں میں ہندوستان کا سب سے بڑا سپلائر ہے۔
اگرچہ الیکٹرانکس ہندوستان کے اہم برآمدی زمروں میں سے ایک ہے، مگر اس شعبے کا انحصار خام مال کیلئےبڑی حد تک چین پر ہے۔ ایک سرکاری افسر نے نام ظاہر نہ کرنے کی شرط پر کہا کہ ’’کئی ہندوستانی کاروباری چین سے اس لئے درآمد کرتے ہیں کہ وہاں خام مال زیادہ سستا دستیاب ہے۔اسلئے درآمدات کو کم کرنا آسان نہیں۔‘‘ یہاں تک کہ جب چین کیلئے برآمدات میں اضافہ ہوتا ہے، تب بھی تجارتی خسارہ بڑھنے کا رجحان رہتا ہے۔ مثلاً اس سال اپریل تااگست برآمدات میں۴؍ فیصد سے کچھ زیادہ اضافہ ہوا، لیکن تجارتی خسارہ۱۵؍ فیصد سے زیادہ بڑھ گیا۔
