انل امبانی کی کمپنی نے فرانسیسی کمپنی ڈسالٹ ایوی ایشن کے ساتھ معاہدہ کیا۔

 انل امبانی کی کمپنی ’ریلائنس ایئرو اسٹرکچر لمیٹڈ ‘نے فرانس کی کمپنی ڈسالٹ ایوی ایشن  کے ساتھ ایک معاہدہ پر دستخط کئے ہیں جس کے تحت  فالکن۲۰۰۰؍ بزنس جیٹ طیارے ہندوستان میں بنائے جائیں گے۔ یہ پہلا موقع ہوگا جب ڈسالٹ اپنے فالکن جیٹس فرانس  کے باہر تیار کرے گی۔ اس معاہدے کا اعلان پیرس ایئر شو میں کیا گیا ۔واضح رہے کہ  ریلائنس ایئرو اسٹرکچران امبانی کی کمپنی  ریلائنس انفرااسٹرکچر کی ذیلی کمپنی ہے۔ ’’ڈسالٹ- ریلائنس ایرواسپیس لمیٹڈ‘‘ ۲۰۱۷ءمیں ریلائنس اور ڈسالٹ کے جوائنٹ وینچر  کے طور پر شروع ہوئی تھی۔ اسی نئی شراکت داری کے تحت ’’ڈسالٹ- ریلائنس ایرواسپیس لمیٹڈ‘‘ کو  فالکن۲۰۰۰؍کےپروڈکشن  کے اختیارات  منتقل کئے جائیں گے۔ فالکن جیٹ کی تیاری مہاراشٹرا کے ناگپور میں واقع ریلائنس کے ڈسالٹ ریلائنس ایرواسپیس لمیٹڈ کے پلانٹ میں کی جائے گی۔ یہی وہ فیکٹری ہے جو۲۰۱۹ء سے فالکن ۲۰۰۰؍ کے کچھ پرزے تیار کر رہی ہے۔ اب پورا جیٹ یہیں تیار کیا جائے گا۔