ہندوستان میں اگلے ماہ ٹی ٹوینٹی ورلڈ کپ کھیلنے سے انکار کے بعد آئی سی سی کا فیصلہ ،اسکاٹ لینڈ کو موقع ملے گا ، بنگلہ دیش بورڈ برہم

بنگلہ دیش اگلے ماہ ہندوستان میں ہونے والے ٹی ٹوینٹی عالمی کپ سے باہر ہو گیا ہے۔ آئی سی سی نے بنگلہ دیش کو ہندوستان میں کھیلنے کا فیصلہ کرنے کیلئے۲۴؍ گھنٹے کی مہلت دی تھی لیکن بی سی بی (بنگلہ دیش کرکٹ بورڈ) کے ذریعہ ہندوستان میں اپنے میچ نہ کھیلنے کے اعلان کے بعد ٹیم کو ٹورنامنٹ سے باہر کرنے کا فیصلہ کرلیا گیا۔ جمعرات کو ڈھاکہ میں بی سی بی اور بنگلہ دیش حکومت کی میٹنگ ہوئی جس میں فیصلہ کیاگیا کہ بنگلہ دیش کرکٹ ٹیم ہندوستان میں ٹی ۲۰؍ عالمی کپ نہیں کھیلے گی۔ اس کی جانکاری آئی سی سی کو بھی دی گئی، جس کے بعد آئی سی سی نے فیصلہ کیا کہ بنگلہ دیش کی جگہ ٹورنامنٹ میں اسکاٹ لینڈ کو موقع دیا جائے گا۔
 اس سے قبل بی سی بی چیف نے حکومت کے ساتھ میٹنگ کے بعد اعلان کیا کہ ان کی ٹیم ہندوستان میں ایک بھی میچ نہیں کھیلے گی۔ انہوں نے اس معاملہ میں آئی سی سی کو تنقیدوں کا نشانہ بھی بنایا۔ بی سی بی چیف نے کہا کہ ’’آئی سی سی نے ہماری درخواستوں کے باوجود ہمارے مقابلے ہندوستان سے شفٹ نہیں کئے۔ حقیقت یہ ہے کہ  عالمی کرکٹ کی مقبولیت کم ہوتی جا رہی ہے۔ ایسے میں ایک کرکٹ پریمی ملک کو ٹورنامنٹ سے بلاوجہ باہر کرنا آئی سی سی کا ہی نقصان ہے۔‘‘ انہوں نے مزید کہا کہ آئی سی سی نے ۲۰؍کروڑ لوگوں کو مایوس کیا ہے۔ کرکٹ اب اولمپک میں جا رہا ہے لیکن اگر ہمارے جیسا ملک وہاں نہیں جا رہا تو یہ آئی سی سی کی ناکامی ہے۔
 واضح رہے کہ میڈیا رپورٹس میں پہلے ہی بتا دیا گیا تھا کہ بنگلہ دیش اپنی ضد پر قائم ہے اور آئی سی سی کے الٹی میٹم کے باوجود اس نے ایک بار پھر اعادہ کیا ہے کہ وہ ہندوستان میں ٹی ۲۰؍ ورلڈ کپ کے میچ نہیں کھیلے گا۔ ڈھاکہ میں جمعرات کو بنگلہ دیش کرکٹ بورڈ (بی سی بی) اور کھلاڑیوں کی عبوری حکومت کے کھیلوں کے مشیر آصف نذرل کے ساتھ میٹنگ ہوئی تھی۔ میٹنگ کے بعد بی سی بی کے صدر امین الاسلام بُلبل نے بتایا کہ ان کا موقف واضح ہے۔آصف نذرل کے ساتھ میٹنگ میں بی سی بی صدر امین الاسلام، سی ای او نظام الدین کے ساتھ ساتھ بنگلہ دیش کے کچھ کھلاڑی بھی شامل تھے۔ ’ای ایس پی این کرک انفو‘ کی رپورٹ کے مطابق کھلاڑی عالمی کپ میں حصہ لینا چاہتے ہیں لیکن بی سی بی نے میٹنگ کے بعد ایک بار پھر اپنا پرانا راگ الاپا اور کہا کہ ان کی ٹیم اس ٹورنامنٹ کے لئے ہندوستان کا سفر نہیں کرے گی۔
 میٹنگ کے بعد بی سی بی صدر امین الاسلام نے کہا کہ ہم آئی سی سی سے مسلسل رابطے میں ہیں۔ بنگلہ دیش عالمی کپ میں کھیلنا چاہتا ہے لیکن وہ اپنے میچ ہندوستان میں نہیں کھیلے گا۔ ہم مسلسل لڑائی جاری رکھیں گے۔ آئی سی سی بورڈ کی میٹنگ میں کئی حیران کن فیصلے ہوئے۔ مستفیض الرحمٰن کا معاملہ واحد معاملہ نہیں ہے اس حوالے سے تمام فیصلے صرف ہندوستان کر رہا ہے جس کی ہم مخالفت کرتے ہیں۔امین الاسلام نے کہا کہ آئی سی سی نے ہندوستان سے باہر میچ کرانے کی ہماری درخواست مسترد کر دی تھی۔ آئی سی سی سری لنکا کو شریک میزبان کہہ رہا ہے لیکن وہ شریک میزبان نہیں ہیں بلکہ ہائبرڈ ماڈل کی طرح کام ہو رہا ہے۔ بنگلہ دیش کی عبوری حکومت کے کھیلوں کے مشیر آصف نذرل نے کہا کہ ہمیں امید ہے کہ آئی سی سی ہمیں سری لنکا میں کھیلنے کا موقع دے گی۔ ہندوستان نہ جانے کا فیصلہ ہماری حکومت نےکیا ہے کیوں کہ وہاں سیکوریٹی کے تعلق سے ہمیں خدشہ ہے اس لئے آئی سی سی کو بنگلہ دیش کے معاملے پر غور کرنا ہو گا۔