غیر سرکاری تنظیم جن ادھیکار سنگھرش پریشد کی شکایت پرمرکزی وزیر مالیات اور بی جے پی کے صدر کیخلاف یہ حکم بنگلور کی خصوصی عدالت نے دیا ہے

 یہاں خصوصی  عدالت نے مرکزی وزیر مالیات نرملا سیتارمناور بی جے پی کے صدر جے پی نڈا کے خلاف انتخابی بونڈ کے ذریعے  جبراً وصولی کے الزام میں ایف آئی آر درج کرنے کا حکم دیا ہے۔ اس حکم سے بی جے پی کی صفوں میں کھلبلی مچ گئی ہے۔ بنگلور میں عوامی نمائندوں کی خصوصی عدالت نے یہ حکم انتخابی بونڈ کے ذریعہ جبراً وصولی کے الزام میں دیا ہے۔ اس سلسلے میںغیر سرکاری تنظیم جن ادھیکار سنگھرش پریشد (جے ایس پی) کے شریک صدر آدرش ایّر نے خصوصی عدالت میں شکایت درج کرکے مرکزی وزیر نرملا سیتارمن، جے پی نڈا اور دیگر کے خلاف کارروائی کا حکم دینے کی مانگ کی تھی۔ انہوں نے شکایت کی تھی کہ وزیر مالیات نرملا سیتا رمن نے ای ڈی کے ساتھ سازش کرکے تانبے اور ایلومینیم کی کانوں کی مالک کمپنیوں ویدانتا اور اسٹرلائٹ اور  فارما کمپنی اربندو فارما کو ڈرا دھمکا کر انتخابی بونڈ کے ذریعے جبراً وصولی کی۔ یہ وصولی ۸؍ ہزار کروڑ  روپے سے زائد کی ہے۔ واضح رہے کہ اربندو فارما کے ڈائریکٹر پی شرت چندر ریڈی کو ای ڈی نے گرفتار کیا تھا ۔ گرفتاری کے ۲؍ دن بعد ہی انہوں نے سرکاری گواہ بننے کی ہامی بھرلی تھی اور پھر انتخابی بونڈ خرید کر بی جے پی کو دیا تھا ۔ 
  نرملا سیتارمن کے ساتھ ساتھ بی جے پی کے قومی صدر جے پی نڈا، بی جے پی کے ریاستی صدر بی وائی وجندر، بی جے پی لیڈر نلن کمار کتیل، مرکزی اور ریاستی بی جے پی دفاتر اور ای ڈی محکمہ کے خلاف بھی شکایت درج کرائی گئی ہے۔