مہکر تعلقہ کے دیول گاؤںمیں اتوار کی رات سے شدید بارش ، دودھا، برہم پوری، کلیانہ، عسرن، ناگ جھری ا ور کئی دیگر دیہاتوں میں پانی ہی پانی
EPAPER
Updated: September 21, 2022, 9:42 AM IST | Banda
مہکر تعلقہ کے دیول گاؤںمیں اتوار کی رات سے شدید بارش ، دودھا، برہم پوری، کلیانہ، عسرن، ناگ جھری ا ور کئی دیگر دیہاتوں میں پانی ہی پانی
مہکر تعلقہ کے دیولگاؤں مالی منڈل علاقے میں اتوار ۱۹؍ ستمبر کی رات سے ہونے والی شدید بارش اور پین ٹاکلی پروجیکٹ کے تمام دروازے کھول دیے جانے سے پین گنگا ندی میں طغیانی آگئی جس سے کھیتوں میں پانی داخل ہو گیا اور۶؍ ہزار ہیکٹر پر کھڑی خریف کی فصلوں کو شدید نقصان پہنچا ہے۔ شام کو گرج چمک کے ساتھ تیز بارش نے پورے تعلقہ کو اپنی لپیٹ میں لے لیا۔ دوبارہ شروع ہونے والی بارش نے کافی نقصان پہنچایا ہے۔ کوراڑی، پین ٹاکلی پروجیکٹ کے اسٹوریج ایریا میں زیادہ بارش(۹۹؍ ملی میٹر)کی وجہ سے پین ٹاکلی کے تمام گیٹ کھول دیے گئے ہیں اور شیڈ سے ۶؍ ہزار۷۴۳؍ کیوسیک پانی چھوڑا گیا ۔کوراڑی پروجیکٹ کے دہانے سے پانی کی بڑی مقدار بہنے سے پین گنگا ندی میں طغیانی آگئی اور پانی دودھا، برہم پوری، کلیانہ، عسرن، ناگ جھری، بابل کھیڑ، مہکر، پرتاپور انتری دیشمکھ بوری، سوناتی وغیرہ دیہاتوں کے کنارے کھیتوں میں داخل ہونے سے کھیت تالاب کا منظر پیش کررہے تھے۔ سویا بین کی فصل اکھڑ کر بہہ گئی ہے۔ کئی علاقوں میں فصلوں کا صفایا ہو چکا ہے۔ تور، کپاس، مکئی کی فصلیں زمین سے لپٹی ہوئی ہیں۔ کچھ جگہوں پر سویابین کی فصل اپنے آخری مرحلہ میں داخل ہو چکی تھی اور اگلے۱۵؍ دنوں میں سویابین تیار ہوکر کسانوں کے گھروں تک پہنچ جاتی لیکن بے موسم بارش اور ندی نالوں میں طغیانی کی وجہ سے چھ ہزار ہیکٹر رقبہ کی فصل تباہ ہو گئی۔
واضح رہے کہ کسانوں نے بینکوں سے قرض لے کر خریف کی فصل کے لیے کافی خرچ کیا ہے اور اب شدید بارش کی وجہ سے کسان پریشان ہو گئے ہیں۔حکام کو دیولگاؤں مالی منڈل علاقہ کے گاؤںمیں گزشتہ روز کی موسلادھار بارش اور ندی میں طغیانی کی وجہ سے فصلوں اور دیگر نقصانات کا پنچنامہ کرنے کی ہدایات دی گئی ہیں۔