۳؍ کوکی باشندوں کے قتل کے بعد ناگا اکثریتی دیہاتوں پر یہ حملہ ۲۴؍ گھنٹے کے اندر ہوا، گھروں کو آگ لگادی گئی۔

منی پور کے کانگ پوکپی ضلع میں منگل کو امپھال-تامینگ لونگ سڑک کے قریب کئی ناگا اکثریتی دیہاتوں پر حملے   ہوئے ہیں۔ نامعلوم مسلح حملہ آوروں  نے گھروں اور گاڑیوں کو آگ لگادی اور فائرنگ بھی کی ۔ اس دوران ایک پادری گولی لگنے سے زخمی ہوگیا ہے۔ 

یہ بھی پڑھئے: ’’جی ڈی پی کے اعدادوشمار زمینی حقائق سے کوسوں دور ہیں‘‘

متاثرہ علاقوں میں ٹیپون کھوناؤ، ٹیپون کھونول اور مکوئی ٹیپورام سمیت دیگر ناگابستیاں شامل ہیں۔ فائرنگ اور دھماکوں کا سلسلہ کئی گھنٹوں تک جاری رہا۔ تاہم حملہ آوروں کی شناخت یا وابستگی کی پولیس کی جانب سے فوری طور پر باضابطہ تصدیق نہیں کی گئی۔ یہ واقعہ کانگ پوکپی میں ایک روز قبل ۳؍کوکی  باشندوں کی ہلاکت اور ۴؍ افراد کے زخمی ہونے کے بعد  ۲۴؍ گھنٹے کے اندر پیش آیا ہے۔اس کی وجہ سے  علاقے میں ایک بار پھر کشیدگی بڑھنے کا خدشہ پیدا ہوگیا ہے۔ منی پور میں جاری نسلی تشدد پر مودی سرکار ۲؍ سال بعد بھی قابو پانے میں ناکام ہے۔  تازہ واقعہ کے بعد سیکوریٹی فورسیز کو الرٹ کردیا گیا ہے۔