ریاست کے تمام بورڈ اور میڈیم اسکولوں کیلئے آئندہ تعلیمی سال سے مراٹھی پڑھانا لازمی قرار دیا گیا ہے، جو اسکول مراٹھی نہیں پڑھائیں گے ان کارجسٹریشن منسوخ کیا جاسکتا ہے۔

ریاست کے تمام بورڈ اور میڈیم اسکولوں کیلئے آئندہ تعلیمی سال سے مراٹھی پڑھانا لازمی قرار دیا گیا ہے، جو اسکول مراٹھی نہیں پڑھائیں گے ان کارجسٹریشن منسوخ کیا جاسکتا ہے۔ یہ فیصلہ آنے والے تعلیمی سال سے مؤثر طریقے سے نافذ کیا جائے گا۔ قانون ساز اسمبلی میں ریاستی اسکولی تعلیم کے وزیر دادا بھُسے نےیہ اعلان کیا ہے۔ واضح رہے کہ قانون ساز اسمبلی میں رکن اسمبلی ہارون خان نے کہاکہ’’ مراٹھی زبان کو کلاسیکی زبان کا درجہ دیا گیا ہے اور ریاستی حکومت نے ریاست کے تمام بورڈ اور میڈیم اسکولوں میں مراٹھی پڑھانے کو لازمی قرار دیا ہے، اس کے باوجود بورڈ کے کچھ اسکولوں میں ابھی بھی مراٹھی نہیں پڑھائی جا رہی ہے۔ ممبئی کے دھیرو بھائی امبانی انٹرنیشنل اور بامبے اسکاٹش جیسے بڑے اسکولوں میں مراٹھی نہیں پڑھائی جا رہی ہے۔ کیا حکومت ان اسکولوں کی تحقیقات کے بعد کارروائی کرے گی؟ اسی طرح کیا تمام میڈیم کے اسکولوں میں مراٹھی پڑھائی جائے گی؟

یہ بھی پڑھئے: مسافروں کی فوری مدد اور شکایات کے ازالے کیلئے ہیلپ ڈیسک کو مزید فعال بنانے کی پہل

اسی طرح ایم ایل اے امیت دیشمکھ اور اتل بھات کھلکر نے بھی اس بحث میں حصہ لیا اور سوال اٹھایا کہ کیا صرف تمام بورڈز کے ہی نہیں اردو، ہندی اور گجراتی میڈیم کے اسکولوں میں مراٹھی مضمون پڑھایا جائے گا اور اس کی جانچ کی جائے گی۔ ان سوالوں کے جواب میں وزیر تعلیم دادا بھُسے نے کہا کہ ’’ریاست کے تمام میڈیم اور بورڈز کے اسکولوں میں قانون کے ذریعہ مراٹھی پڑھانا لازمی قرار دیا گیا ہے۔ مراٹھی نہ پڑھانے والے اسکولوں کی چھان بین کی جائے گی اور متعلقہ اسکولوں کی شناخت منسوخ کر دی جائے گی۔ ‘‘