بوسنیا کے شہر زینیتسا کے دس سالہ عفان ملک نے اپنی گرمیوں کی چھٹیاں فلسطینی بچوں کے لیے لیمو شربت بیچ کر چندہ جمع کرنے کے منفرد طریقے سے گزارنے کا فیصلہ کیا ہے۔

غزہ میں اسرائیل کے بڑھتے مظالم کے خلاف پوری دنیا میں مظاہرے ہو رہے ہیں۔ہر امن پسند فرد غزہ کی حمایت میں اپنی آواز بلند کر رہا ہے۔ ساتھ ہی کئی افراد نے انوکھے انداز میں بھی غزہ سے اظہار ہمدردی کی ہے۔ اسی طرح کا ایک بوسنیائی بچہ عفان ہے ، جس کی عمر محض دس سال ہے۔ غزہ میں جاری بھکمری سے غمزدہ ہوکر اس معصوم بچے نے متاثرین کیلئے چندہ جمع کرنے کے مقصد سےلیمو کا شربت بیچنے کا فیصلہ کیا۔
عفان کا کہنا ہے کہ ’’ میرا مقصدغزہ کے عوام کو یہ بتانا ہے کہ وہ یہ جان لیں کے وہ اکیلے نہیں ہیں۔‘‘ عفان کے مطابق اس کیلئے سب سے بڑا انعام ان لوگوں کی مسکراہٹ اور شکریہ ہے جو اس کے مقصد میں شامل ہوتے ہیں۔عفان نے اپنی خواہش کا اظہار کرتے ہوئے کہا کہ ’’ ایک دن اس کا تیار کردہ لیمو شربت بازار میں فروخت ہو تاکہ وہ بڑے پیمانے پر غزہ کے بچوں کی مدد کر سکے۔‘‘