راجستھان بی جےپی میں کھلبلی مچ گئی، سابق وزیراعلیٰ  اپنے دفاع پر مجبور، اشوک گہلوت پر جھوٹ بولنے اور من گھڑت کہانی بیان کرنے کا الزام عائد کیا

وزیراعلیٰ اشوک گہلوت کے اس دعویٰ سے  راجستھان کی سیاست میں ہلچل مچ گئی ہے کہ  ۲۰۲۰ء میں جب سچن  پائلٹ  نے بغاوت کی تھی اور حکومت کے گرنے کاخطرہ لاحق ہوگیاتھا اس وقت بی  جےپی لیڈر اور سابق وزیراعلیٰ  وسندھرا رانے سندھیا نے  حکومت بچانے میں ان کی مدد کی تھی۔  انہوں نے دھول پور میں ایک پروگرام سے خطاب میں یاد دلایا کہ جب سچن پائلٹ  نے ۱۸؍ اراکین اسمبلی کے ساتھ  ان کے خلاف بغاوت کا پرچم لہرایاتھا تب  وسندھرا راجے سندھیا اور بی جےپی لیڈر کیلاش میگھوال نے اراکین  اسمبلی کی خریدوفروخت کے خلاف آواز بلند کی تھی۔ گہلوت نے دعویٰ  کیا کہ ان کی حکومت گرانے کی ’’اس سازش ‘‘میں وزیر داخلہ امیت شاہ، مرکزی وزیر دھرمیندر پردھان اور گجیندر سنگھ شیخاوت شامل تھے۔
  وزیراعلیٰ اشوک گہلوت کے اس دعوے سے راجستھان بی جے پی  میں  ہلچل مچ گئی ہے۔ دلچسپ بات یہ ہے کہ گہلوت کا کہنا ہے کہ  وسندھرا نے سچن کی بغاوت کو ناکام بنانے میں مدد کی تھا اور سچن  پائلٹ  نے کچھ عرصہ قبل ہی وسندھرا راجے سندھیا کے خلاف کاروائی کیلئے جے پور میں ایک دن کی بھوک ہڑتال کی تھی۔  بہرحال اشوک گہلوت  کے عوامی سطح پر دیئے گئے اس بیان کے بعد  وسندھرا راجے سندھیا  جواب دینے پر مجبور ہوگئیں۔انہوں نے کہا کہ ’’۲۰۲۳ء کی فتح کے خوف سے اشوک گہلوت جھوٹ بول رہے ہیں۔‘‘ گہلوت کو دروغ گو ثابت کرنے کیلئے سندھیا نے  حوالہ دیا کہ ’’انہوں نے وزیرداخلہ امیت شاہ  پر بھی الزام عائد کیا ہے حالانکہ ان کی ایمانداری سے سب واقف ہیں۔‘‘ وسندھرا راجے سندھیا کے مطابق’’اشوک گہلوت کا میری تعریف کرنا میرے خلاف ایک منصوبہ بند سازش ہے۔‘‘ انہوں نے کہا کہ ’’میری پوری زندگی میں  میری جتنی بے عزتی  اشوک گہلوت نے کی ہے، کسی نے نہیں کی۔ ‘‘
 گہلوت نے اپنی تقریر میں امیت شاہ، شیخاوت  اور پردھان  پر ان کی حکومت گرانے کیلئے کانگریس کے اراکین اسمبلی میں پیسے تقسیم کرنے کا بھی الزام عائد کیا اور حیرت کااظہار کرتے ہوئے کہا کہ وہ پیسہ اب تک واپس بھی نہیں مانگا گیاہے۔اس کا حوالہ دیتے ہوئے وسندھرا راجے سندھیا نے کہا کہ وزیراعلیٰ کو اس سلسلے میں ایف آئی آر درج کرانی چاہئے۔