انڈیگو کے بحران کے درمیان پریشان حال مسافروں کا استحصال کرتے ہوئے غیر معمولی طور پر زیادہ ہوائی کرایوں کے خلاف حکومت نے کارروائی کا اعلان کیا، سول ایوی ایشن وزارت نے ایک بیان میں کہا کہ اس نے بحران کے دوران ’’ریگولیٹری اختیارات‘‘ استعمال کیے ہیں تاکہ یہ یقینی بنایا جا سکے کہ مسافروں کا استحصال نہ ہو اور متاثرہ راستوں پر مناسب کرایے وصول کیے جائیں۔

ہندوستانی حکومت نےسنیچر کو ملک بھر میں انڈیگو پروازوں کے وسیع پیمانے پر منسوخ ہونے کے درمیان ایئرلائنز کی ’’موقع پرستانہ قیمتوں‘‘ کے خلاف کارروائی کا اعلان کیا۔ سول ایوی ایشن وزارت نے ایک بیان میں کہا کہ اس نے بحران کے دوران ’’ریگولیٹری اختیارات‘‘ استعمال کیے ہیں تاکہ یہ یقینی بنایا جا سکے کہ مسافروں کا استحصال نہ ہو اور متاثرہ راستوں پر مناسب کرایے وصول کیے جائیں۔واضح رہے کہ اعلان اس وقت سامنے آیا جب ہوائی کرایوں میں نمایاں اضافہ دیکھا گیا، اور دہلی سے بنگلور پرواز کا کرایہ ایک لاکھ روپے تک پہنچ گیا۔وزارت نے اپنے بیان میں کہا، ’’سول ایوی ایشن وزارت نے موجودہ خلل کے دوران کچھ ایئرلائنز کی جانب سے غیر معمولی طور پر زیادہ ہوائی کرایوں کے بارے میں خدشات کو سنجیدگی سے لیا ہے۔ مسافروں کو موقع پرستانہ قیمتوں سے بچانے کے لیے، وزارت نے تمام متاثرہ راستوں پر منصفانہ اور معقول کرایے یقینی بنانے کے لیے اپنے ریگولیٹری اختیارات استعمال کیے ہیں۔‘‘

یہ بھی پڑھئے: ڈی جی سی اے نے انڈیگو کو پائلٹ نائٹ ڈیوٹی کے ضوابط میں مہلت دی

بیان میں مزید کہا گیا، ’’تمام ایئرلائنز کو ایک سرکاری ہدایت جاری کی گئی ہے جس میں اب طے کردہ کرایوں کی حدوں پر سختی سے عمل کرنا لازمی ہے۔ یہ حدیں اس وقت تک نافذ رہیں گی جب تک کہ صورتحال مکمل طور پر مستحکم نہ ہو جائے۔ اس ہدایت کا مقصد مارکیٹ میں قیمتوں کا نظم و ضبط برقرار رکھنا، پریشان مسافروں کے کسی بھی استحصال کو روکنا، اور یہ یقینی بنانا ہے کہ جن شہریوں کو فوری سفر کرنے کی ضرورت ہےبشمول بزرگ شہری، طلباء اور مریض، اس دوران مالی مشکلات کا سامنا نہ کرنا پڑے۔‘‘ بیان میں مزید کہا گیا، ’’وزارت حقیقی وقت کے ڈیٹا اور ایئرلائنز اور آن لائن ٹریول پلیٹ فارمز کے ساتھ رابطے کے ذریعے کرایوں کی سطح پر مسلسل نظر رکھے گی۔ طے شدہ ضوابط سے کوئی بھی انحراف عوامی مفاد میں فوری کارروائی کا باعث بنے گا۔‘‘

یہ بھی پڑھئے: انڈیگو کی پروازوں میں رکاوٹ ، ایئر پورٹ پر پھنسی خاتون نے مدد کی التجا کی

واضح رہے کہ گزشتہ ہفتےڈی جی سی اے  کی جانب سے جاری کردہ نئے رہنما اصولوں کے سبب انڈیگو ائیر لائنس کی پروازیں بری طرح متاثر ہوئی تھیں، جس کے سبب تقریباً ۵۰۰؍ پروازیں منسوخ اور سیکڑوں پرازویں تاخیر کا شکار ہو گئیں، نتیجہ یہ ہوا کہ ہوائی اڈوں پر مسافر افراتفری کا شکارہوگئے، ایسے وقت میں ایسے پریشان مسافر جو اپنی منزل پر پہنچنا چاہتے تھے، ان کی اس مجبوری کا فائدہ اٹھاتے ہوئےدیگر ائیر لائنس نے ان سے اصل قیمت سے کئی گنا زیادہ کرایہ وصول کیا۔ حکومت نے اس کا نوٹس لیتے ہوئے ان کے خلاف کارروائی کا اعلان کیا ہے۔