کانگریس اور این سی پی نے بھی بھگت سنگھ کوشیاری کے گمراہ کن بیان کی مذمت کی

  مہاراشٹر کے گورنر کے ذریعے چھترپتی شیواجی مہاراج کے تعلق سے متنازع بیان دینے پرکانگریس اور این سی پی کی جانب سے شدید لفظوں میں مذمت کی جارہی ہے۔ کانگریس کے ریاستی صدر ناناپٹولے نے مطالبہ کیا ہے کہ گورنر بھگت سنگھ کوشیاری نے چھتر پتی شیواجی مہاراج کی توہین کی ہے اور وہ  عوام سے معافی مانگیں جبکہ این سی پی کے ریاستی ترجمان مہیش تپاسے  نےگورنر کے بیان کو گمراہ کن بیان قرار دیا ہے۔
 اس سلسلے میں نانا پٹولے نے کہا کہ ’’چھترپتی شیواجی مہاراج مہاراشٹر کی انتہائی معزز شخصیت ہیں اور وہ پوری دنیا میں مشہور ہیں ۔ مہاراشٹر کے گورنر بھگت سنگھ کوشیاری کے ذریعہ ان کی توہین کو کبھی برداشت نہیں کیا جائے گا۔کوشیاری کی پرورش راشٹریہ سویم سیوک سنگھ کی سرپرستی میں ہوئی ہے اس لئے وہ گمراہ کن بیان دے رہے ہیں۔‘‘
 پٹولے نے کہا کہ اس حقیقت کے باوجود کہ رام داس سوامی چھترپتی شیواجی مہاراج کے گرو نہیں تھے، کچھ مورخین جان بوجھ کر تاریخ کو توڑ مروڑ کر رام داس سوامی کو چھترپتی شیواجی مہاراج کا استاذ بنانے کی کوشش کر رہے ہیں۔ چھترپتی شیواجی مہاراج کی تصنیف اور ان کی شہرت بڑی ہےلیکن رام داس سوامی کو مہاراج کا استاذ دکھا کر ان کے ساتھ امتیازی سلوک کیا جا رہا ہے۔ بھگت سنگھ کوشیاری ایک آئینی عہدے پر فائزہیں اور تاریخ کو توڑنے کے لئے وہ راشٹریہ سویم سیوک سنگھ کے لئے کام کر رہے ہیں۔ ایسے شخص کو گورنر  کے عہدے پر بیٹھنے کا کوئی اخلاقی حق نہیں ہے، مرکزی حکومت کو انہیں واپس بلانا چاہیے۔‘‘پٹولے کے بقول بارہا دیکھا گیا ہے کہ بھارتیہ جنتا پارٹی چھترپتی شیواجی مہاراج کو صرف ووٹ بینک کے لئے استعمال کر رہی ہے۔ گزشتہ ہفتے  مرکزی وزیر پیوش گوئل نے بھی شیواجی مہاراج کے تعلق سے متنازع بیان دیا تھا۔
اگر گورنر نے چھترپتی شیواجی مہاراج کی تاریخ کو ٹھیک سے پڑھا ہوتا تو وہ ایسا نہیں کہتے:  تاپسے
 گورنر کے متنازعہ بیان پر این سی پی کے چیف ریاستی ترجمان مہیش تاپسے نے میڈیا سے بات کرتے ہوئے کہا کہ اگر گورنر نے چھترپتی شیواجی مہاراج کی راج ماتا جیجاؤ کی تاریخ پڑھی ہوتی تو اس طرح کا بیان نہیں دیتے ۔ مہاراشٹر کے دیوتاشخصیت چھترپتی شیواجی مہاراج کا سمرتھ رامداس سے براہ راست کوئی تعلق نہیں تھا ۔چھترپتی شیواجی مہاراج کی گرو راج ماتا جیجاؤ تھیںاور انہوں نے ہی بہترین تربیت کی اور  شیواجی کوچھتر پتی شیواجی  مہاراج بنایا ۔
 پوار نے ہندوستانی طلبہ کیلئے بات چیت کی...
 مہیش تاپسے نے یہ بھی بتایا کہ روس اور یوکرین کے درمیان جنگ کے پیش نظر نیشنلسٹ کانگریس پارٹی ( این سی پی ) کے قومی صدر شرد پوار نے وزیر خارجہ جے شنکر کے ساتھ بات چیت کی ہے۔ یوکرین۔پولینڈ کی سرحد پر ہزاروں ہندوستانی طلبہ پھنسے ہوئے ہیں۔ پوار نے درخواست کی ہے کہ ان طلبہ کو جلد از جلد وطن واپس لانے کے لئے مزید کوششیں کی جائیں۔
نواب ملک حکومت کی اہم زمینی توپ ہیں
 مہیش تاپسے نے کہا کہ’’ نواب ملک مہاو کاس اگھاڑی کی توپ ہیں اور اسی لئے ان پر جھوٹا الزام عائد کر کے انہیں بدنام کرنے اور ان کی آواز کو دبانے کی کوشش  کی جارہی ہے۔ نواب ملک پر جو مقدمہ درج کیا گیا ہے وہ بہت پرانا ہے  اور جس قانون کے تحت معاملہ درج کر کے جانچ کی جارہی ہے  وہ قانون اس وقت نہیں بنا تھا۔مہیش تاپسے نے یہ بھی کہا کہ نواب ملک کا جن لوگوں سے تعلق جوڑا جا رہا ہے  وہ حیات نہیں ہیں۔انہوں نے کوئی نئی جگہ نہیں لی ہے۔مہیش تاپسے نے یہ بھی کہا کہ دیویندر فرنویس نے  جو  ’ٹیرر فنڈنگ‘ کی اصطلاح  استعمال کی ہے ویسا کوئی معاملہ نہیںہے۔