آج گیان واپی معاملے کی سماعت کرتے ہوئے وارانسی ضلعی عدالت نے انجمن انتظامیہ مسجد کمیٹی کے مسجد کے تہہ خانے میں پوجا کی اجازت کے فیصلے کے خلاف درخواست پر سماعت کرنے کیلئے ۱۵؍ فروری کا دن طے کیا ہے۔ خیال رہے کہ مسجد کمیٹی نے الہ آباد ہائی کورٹ میں بھی ا س فیصلے کو چیلنج کیا ہے جو ۱۲؍ فروری کو اس معاملے کی سماعت کرے گا۔

ہندو فریق کے وکیل نے کہا کہ وارانسی کی ضلعی عدالت نے آج گیان واپی مسجد کمیٹی کے مسجد کے تہہ خانے میں پوجا کی اجازت دینے کےفیصلے کے خلاف درخواست پر ۱۵؍ فروری کو سماعت کرنے کا فیصلہ سنایا ہے۔ وکیل مدن موہن یادونے کہا کہ میں نے ضلعی جج انیل کمار سے کہا کہ جب ۱۲؍ فروری کو الہ آباد ہائی کورٹ اس معاملے میں سماعت کرے گا تواس کا کوئی فائدہ نہیں ہےکہ ضلعی عدالت اس معاملے میں سماعت کرے۔بعد ازیں عدالت نے اس معاملے کی سماعت کو ۱۵؍ فروری تک کیلئے ملتوی کیا۔ خیال رہے کہ گزشتہ جمعہ کو وارانسی کی ضلعی عدالت میں اس فیصلے کے خلاف درخواست دینے کے علاوہ انجمن انتظامیہ نے الہ آباد ہائی کورٹ میں بھی فیصلے کے خلاف ایپلی کیشن دیاہے۔ الہ آباد ہائی کورٹ نے اس فیصلے کی سماعت کیلئے ۱۲؍ فروری کی تاریخ مختص کی ہے۔جسٹس روحت رنجن اگروال نے دونوں فریقین کے بیان سننے کے بعد معاملے کو ۱۲؍ فروری تک کیلئے ملتوی کیا تھا۔ 
خیال رہے کہ وارانسی کی ضلعی عدالت نے گیان واپی مسجد کے تہہ خانے میں پوجا کی اجازت کا فیصلہ سنایا تھاجس کے فوراً بعد ہندو فریقین نے تہہ خانے میں پوجا کی تھی۔ انجمن انتظامیہ نے اس فیصلے کو سپریم کورٹ میں چیلنج کیا تھا لیکن سپریم کورٹ نے مسجد کمیٹی کو الہ آباد ہائی کورٹ سے رجوع ہونے کی ہدایت دی تھی۔ 
گیان واپی مسجد کے اے ایس آئی سروے کے بعد وارانسی کی ضلعی عدالت نے سروے کی سائنسی رپورٹ دونوں فریقین کے حوالے کی تھی۔ اس رپورٹ کے مطابق گیان واپی مسجد مغل بادشاہ اورنگ زیب کے دور حکومت میں ٹیمپل کی باقیات پر بنائی گئی تھی۔ یاد رہے کہ مسجد کا اے ایس آئی سروے بھی اسی بنیاد پر کیا گیا تھا کہ معلوم کیا جا سکے کہ یہ مسجد کسی ٹیمپل پر بنائی گئی ہے یا نہیں۔