سپریم کورٹ میں ہندو فریقین کے وکیل وشنو شنکر نے کہا کہ ہم نے وارانسی کے ضلعی کورٹ میں درخواست داخل کی ہے جس میں مطالبہ کیا ہے کہ گیان واپی مسجد کے تہہ خانے کو ویاس خاندان کے قبضے سے لے کر ضلعی مجسٹریٹ کے حوالے کیا جائے اور ضلعی مجسٹریٹ کواس کا وصول کنندہ مقرر کیا جائے۔

سپریم کورٹ میں گیان واپی مسجد معاملے پر جاری سماعت کے دوران ہندو فریق کی نمائندگی کرنے والے وکیل نے عدالت سے کہا کہ وارانسی کے ضلعی کورٹ میں حال ہی میں درخواست داخل کی گئی ہے جس میں گیان واپی مسجد کے کامپلیکس کے تہہ خانہ کو ویاس خاندان کے قبضے سے لے کر مجسٹریٹ کورٹ کے حوالے کرنے کا مطالبہ کیا گیا ہے۔ خیال رہےکہ یہ معاملہ گیان واپی مسجد کے اے ایس آئی سروے کے درمیان سامنے آیا ہے۔ تہہ خان،جو ویاس خاندان کے قبضے میں ہے، مسجد کے جنوبی حصے میں ہے۔ اس ضمن میں ہندو فریق نے مطالبہ کیا ہے کہ تہہ خانہ کو ویاس خاندان کے قبضے سے لے کر فوری طور پر ضلعی مجسٹریٹ کے حوالے کیا جائے اور اسے اس کے وصول کنندہ کے طور پر مقررر کیا جائے۔ اس حوالے سے ہندو فریقین کے وکیل وشنو شنکر نے عدالت سے کہا کہ ہم نے ویاس خاندان کی جانب سے وارانسی کی شہری عدالت میں مقدمہ درج کیا ہے اور وارانسی کی ضلعی عدالت اور ضلعی جج کے سامنے بھی درخواست دی ہے کہ وہ اصل مقدمہ کو ضلعی کورٹ میں منتقل کریں جیسا کہ وہ دیگر معاملات میں کررہے ہیں۔ اس درخواست میں مطالبہ کیا گیا ہے کہ گیان واپی مسجد کا تہہ خانہ جو مسجد کے جنوبی حصے میں ہے، انجمن انتظامیہ مسجد کے زیر قبضہ ہو سکتا ہے۔ تاہم، ہم نے مطالبہ کیا ہے کہ تہہ خانہ کو فوری طور پر ضلعی مجسٹریٹ کے حوالے کیا جائےاور ضلعی مجسٹریٹ کواس کے وصول کنندہ کے طور پر مقرر کیا جائے۔
انہوں نے مزید کہا کہ ہم اسی مطالبہ کے ساتھ ضلعی کورٹ بھی گئے تھے۔ آج ہماری منتقلی کی درخواست پر سماعت ہوئی ہے اور اس معاملے میں انجمن انتظامیہ مسجد کمیٹی نے پیش ہو کر جواب طلب کیا ہے۔ کل ہمیں منتقلی کی ایپلی کیشن پر حکم جاری کیا جائے گا۔ بعد ازیں اس کیس میں مزید کارروائی کی جائے گی۔
خیال رہے کہ گیان واپی مسجد کے ۴؍ تہہ خانوں میں سے ایک پر ویاس خاندان کا قبضہ برقرار ہے جہاں حال ہی میں اے ایس آئی کا سروے جاری ہے۔ خیال رہے کہ یہ سروے اس لئے کیا جا رہا ہے کہ یہ معلوم کیا جا سکے کہ گیان واپی مسجد کسی مندر پر بنائی گئی ہے یا نہیں۔ اس ضمن میں آج سپریم کورٹ نے اس کیس کی سماعت کی ہے۔ ۱۹۹۱ء میں ویاس خاندان نے مقدمہ درج کیا تھا کہ گیان واپی مسجد کو ہندوؤں کے حوالے کیا جائے۔ انہوں نے یہ دعویٰ کیا تھا کہ مسجد کے اوپری حصے جہاں نماز ادا کی جاتی ہے اور گنبد کے علاوہ، مسجد کی پوری ساخت ویششورمندر پر بنائی گئی ہے۔ اب بھی مسجد کے ۴؍ تہہ خانوں میں سے ایک تہہ خانہ انہیں کے قبضے میں ہے۔ اگست میں الہ آباد ہائی کورٹ نے مسجد کے اے ایس آئی سروے کو منظوری دی تھی۔ بعد ازیں کورٹ نے اے ایس آئی کی درخواست پر اسے مسجد کا سروے کرنے کیلئے ۴؍ مزید ہفتوں کی مہلت دی تھی۔