اسٹار آل راؤنڈر ہاردک پانڈیا نے ایک بار پھر اپنے غیر معمولی ٹیلنٹ اور دریا دلی سے مداحوں کے دل جیت لیے ہیں۔ اس مرتبہ انہوں نے کرکٹ کے میدان سے باہر مقبول یوٹیوبر مسٹر بیسٹ کو بیس بال کے ایک دلچسپ مقابلے میں شکست دے کر ایک لاکھ امریکی ڈالر، یعنی تقریباً ۹۵؍ لاکھ روپے کی انعامی رقم حاصل کی۔

ہندوستانی کرکٹ ٹیم کے اسٹار آل راؤنڈر ہاردک پانڈیا نے ایک بار پھر اپنے غیر معمولی ٹیلنٹ اور دریا دلی سے مداحوں کے دل جیت لیے ہیں۔ اس مرتبہ انہوں نے کرکٹ کے میدان سے باہر مقبول یوٹیوبر مسٹر بیسٹ (MrBeast) کو بیس بال کے ایک دلچسپ مقابلے میں شکست دے کر ایک لاکھ امریکی ڈالر، یعنی تقریباً  ۹۵؍ لاکھ روپے کی انعامی رقم حاصل کی، لیکن ان کی جیت سے زیادہ توجہ اس فیصلے نے حاصل کی کہ انہوں نے پوری رقم اپنے پاس رکھنے کے بجائے فلاحی کاموں کے لیے عطیہ کرنے کا اعلان کیا۔
یہ مقابلہ مسٹر بیسٹ کے خصوصی ویڈیو چیلنج کا حصہ تھا، جس میں دنیا کے کئی نامور کھلاڑیوں اور مشہور شخصیات نے شرکت کی۔ ہاردک پانڈیا کے علاوہ باسکٹ بال کے عظیم کھلاڑی لی برون جیمز، فٹبالر ایرلنگ ہالینڈ، اولمپک جمناسٹ سیمون بائلز اور دیگر عالمی شہرت یافتہ کھلاڑی بھی اس ویڈیو میں نظر آئے۔ ہندوستانی یوٹیوبر کیری مناتی نے بھی اس چیلنج میں شرکت کی۔  ہاردک پانڈیا اور مسٹر بیسٹ کے درمیان مقابلہ بیس بال کے ہوم رن چیلنج پر مشتمل تھا۔ اس میں دونوں کھلاڑیوں کو گیند اس انداز سے مارنی تھی کہ وہ میدان کی حدود سے باہر چلی جائے۔ مقابلے کا اصول یہ تھا کہ جو کھلاڑی پہلے تین ہوم رن مکمل کرے گا، وہ ایک لاکھ ڈالر کی انعامی رقم کا حق دار ہوگا۔

یہ بھی پڑھئے:بیلن ڈی اور جیتنے کے بعد پہلے ہی میچ میں ہیری کین پنالٹی گنوا بیٹھے

دلچسپ بات یہ ہے کہ ہاردک پانڈیا نے مقابلے سے پہلے اعتراف کیا کہ انہوں نے اس سے قبل کبھی بیس بال نہیں کھیلا، جبکہ مسٹر بیسٹ کو اسکول کے زمانے میں اس کھیل کا کچھ تجربہ حاصل تھا۔ اس کے باوجود ہندوستانی آل راؤنڈر نے اپنی مضبوط ہٹنگ اور گیند پر بہترین گرفت کا مظاہرہ کرتے ہوئے حریف کو سخت مقابلہ دیا۔مقابلے کے ابتدائی مرحلے میں ہاردک نے ۱۔۲؍ کی برتری حاصل کی، لیکن مسٹر بیسٹ نے واپسی کرتے ہوئے اسکور ۲۔۲؍ کردیا۔ اس کے بعد فیصلہ کن مرحلے میں ہاردک نے ایک اور شاندار شاٹ کھیل کر گیند کو میدان سے باہر پہنچایا اور مقابلہ اپنے نام کرلیا۔ اس طرح انہوں نے ایک لاکھ امریکی ڈالر کا انعام جیت لیا۔ 
 ہاردک پانڈیا کی جیت کا سب سے قابلِ تعریف پہلو ان کا فلاحی جذبہ رہا۔ انہوں نے ایک لاکھ ڈالر کی پوری رقم عطیہ کرنے کا فیصلہ کیا تاکہ اس سے ضرورت مند بچوں اور بے سہارا کتوں کی مدد کی جاسکے۔ اطلاعات کے مطابق اس رقم سے اے ڈی اے پی ٹی (ADAPT) اور کمیونٹی اسٹریٹیز انڈیا (Community Streeties India) جیسی تنظیموں کی معاونت کی جائے گی، جو سماجی بہبود اور جانوروں کی دیکھ بھال کے لیے کام کرتی ہیں۔ 

فلم ’’کنگ‘‘ کا پہلا گیت ’تو مل جائے‘ ریلیز، مداحوں کو ’پٹھان‘ اور ’جوان‘ کی یاد تازہ ہوگئی

ہاردک پانڈیا محدود اوورز کی کرکٹ میں اپنی جارحانہ بلے بازی اور طویل شاٹس کے لیے مشہور ہیں۔ بیس بال جیسے مختلف کھیل میں بھی ان کی کامیابی نے ثابت کیا کہ ان کی کھیلوں سے متعلق مہارت اور گیند کو دور تک مارنے کی صلاحیت کسی ایک کھیل تک محدود نہیں۔ دوسری جانب مسٹر بیسٹ کے اس ویڈیو چیلنج نے کرکٹ، فٹبال، باسکٹ بال اور دیگر کھیلوں سے وابستہ عالمی شہرت یافتہ کھلاڑیوں کو ایک ہی پلیٹ فارم پر جمع کردیا۔
ہاردک کی اس کامیابی نے سوشل میڈیا پر بھی خاصی توجہ حاصل کی ہے۔ مداح ان کی کارکردگی کے ساتھ ساتھ اس بات کی بھی تعریف کررہے ہیں کہ انہوں نے تقریباً ۹۵؍ لاکھ روپے کی انعامی رقم ذاتی استعمال کے بجائے ضرورت مند بچوں اور جانوروں کی مدد کے لیے وقف کردی۔ یوں ہاردک پانڈیا نے مسٹر بیسٹ کے خلاف مقابلہ جیت کر نہ صرف اپنی کھیل کی صلاحیت کا مظاہرہ کیا بلکہ ایک قابلِ تحسین سماجی پیغام بھی دیا۔