یلو الرٹ جاری ، گوانگ ڈونگ، ہانگ کانگ، مکاؤ، گوانگسی، ہینان، تائیوان اور سیچوان کے کچھ حصوں میں شدید بارش کاامکان

چین میں شدید بارش کا سلسلہ برقرار ہے۔ ایسے میں حکومت کی جانب سے یلو الرٹ جاری کیا گیا ہے۔ ملک کے مختلف حصوں  میں  شدید بارش ہوسکتی ہے ۔ 
میڈیار پورٹس کے مطابق چین کے قومی موسمیاتی مرکز نے وارننگ جاری کرتے ہوئے کہا کہ اتواراور سنیچر کو ملک کے کچھ حصوں میں شدید بارش کا امکان ہے۔
چین کے قومی موسمیاتی مرکز نے اتوار کو یلو وارننگ جاری کرتے ہوئے کہا ،’’ اتوار کو صبح۸؍ بجے سے پیر کی صبح ۸؍ بجے تک گوانگ ڈونگ، ہانگ کانگ، مکاؤ، گوانگسی، ہینان، تائیوان اور سیچوان کے کچھ حصوں میں شدید بارش کا امکان ہے۔ ان علاقوں میں موسلادھار بارش ہو سکتی ہے۔موسم کی رپورٹس میں ۸۰؍ ملی میٹر فی گھنٹہ سے زیادہ بارش کی پیش گوئی کی گئی ہے۔‘‘
 مرکز نے مقامی حکومتوں کو موسلا دھار بارش کیلئے تیار رہنے کا مشورہ دیا ہے اور ٹریفک انتظامیہ کے حکام سے کہا کہ وہ شدید بارش سے متاثر سڑکوں پر ٹریفک کنٹرول کیلئے مناسب اقدامات کریں ۔ مرکز نے خطرات والے بیرونی بجلی کی سپلائی منقطع کرنے اور کھلے علاقوں میں بیرونی آپریشن کو عارضی طور پر معطل کرنے اور حساس علاقوں سے عوام کو محفوظ مقامات پر منتقل کرنے کیلئے کہا ہے۔
مرکز نے ضرورت کے مطابق پانی کی نکاسی کو بڑھانے کیلئے ضروری اقدامات کی ہدایت دی ہے ۔ ساتھ ہی کھیتی باڑی اور مچھلی کے تالابوں سے پانی کی نکاسی کے نظام کی جانچ کا بھی حکم دیا ہے۔ ۔