پونے کے اہم گھاٹوں پر لینڈ سلائڈنگ کی وجہ سے سڑکیں بند، سنہہ گڑھ، کسگائوں اور وراندا گھاٹ متاثر، خطہ کوکن میں بھی حالات ابتر۔

ریاست گزشتہ تین چار دنوں سے موسلادھار بارش کی زد میں ہے۔ جون کے مہینے میں کچھ پرسکون رہنے والی بارش جولائی میں شروع ہوئی اور گرمی سے ستائے شہریوں کو راحت ملی۔ دریں اثناء کچھ اضلاع میں مسلسل موسلادھار بارش سے معمولات زندگی درہم برہم ہو گئے ہیں۔ پونے کے اہم گھاٹوں پر لینڈ سلائیڈنگ کی وجہ سے سڑکیں بند ہو گئی ہیں۔ پونے کے سنہہ گڑھ قلعہ، کسگاؤں کھنڈ مارگ اور ورندا گھاٹ علاقوں میں لینڈ سلائیڈنگ ہوئی ہے۔ اس لئے انتظامیہ نے شہریوں اور سیاحوں سے خصوصی خیال رکھنے کی اپیل کی ہے۔ سنگھاڈ قلعہ کے پہلے دروازے کے قریب لینڈ سلائیڈنگ ہوئی۔ خوش قسمتی سے اس واقعے میں کوئی زخمی نہیں ہوا۔ تاہم سیاحوں سے محتاط رہنے کی اپیل کی گئی ہے کیونکہ اس وقت سنہہ گڑھ کے علاقے میں موسلادھار بارش جاری ہے۔ کہا گیا کہ قلعہ جانے والے سیاح انتظامیہ کی ہدایات پر عمل کریں کیونکہ سیڑھیوں کے راستہ پر پھسلن ہے اور لینڈ سلائیڈنگ کا خطرہ بڑھ گیا ہے۔ اس دوران سنہہ گڑھ کو حفاظت کے پیش نظر بند کر دیا گیا ہے۔ 
دریں اثناء موسلا دھار بارش کی وجہ سے کھیڈشیواپور کو راج گڑھ تعلقہ سے جوڑنے والی اہم کسگاؤں کھنڈ سڑک پر بھی لینڈ سلائیڈنگ ہوئی۔ لینڈ سلائیڈنگ کے باعث ٹریفک کچھ دیر کے لئے بند ہوگیا۔ واقعہ کی اطلاع ملتے ہی مقامی شہریوں نے محکمہ تعمیرات عامہ کو اطلاع دی۔ اس کے بعد سڑک پر پڑے پتھروں اور مٹی کو جے سی بی کی مدد سے ہٹا کر ٹریفک کو بحال کیا گیا۔ اس واقعہ میں کوئی بڑا حادثہ پیش نہ آنے سے شہریوں نے راحت کی سانس لی۔ وہیں، بھور تعلقہ کے ورندا گھاٹ علاقے میں بھی بارش بڑھ رہی ہے اور آج صبح شیرگاؤں حدود میں لینڈ سلائیڈنگ ہوئی۔

یہ بھی پڑھئے: ہماچل، گجرات، مدھیہ پردیش میں زبردست بارش

ہائی ویز کے ڈویژنل انجینئر راہل کلکرنی نے متعلقہ ٹھیکیداروں کو فوری طور پر لینڈ سلائیڈ کو ہٹانے کی ہدایت دی ہے اور انتظامیہ کی مشینری موقع پر پہنچ گئی ہے۔ ورندا گھاٹ پونے سڑک کو نئی قومی شاہراہ کے طور پر اعلان کیا گیا ہے، اس جگہ پر بڑے پیمانے پر سڑک کی توسیع کا کام جاری ہے۔ اس لئے یہ سڑک گزشتہ چند دنوں سے بھاری گاڑیوں کے لیے بند تھی۔ اس کے باوجود اس سڑک پر ٹریفک جاری تھی تاہم احتیاط کے طور پر آج سے ٹریفک بند کر دیا گیا ہے۔ 
خطہ کوکن کےسنگمیشور تعلقہ میں رتناگیری-ناگپور شاہراہ پر دکن اور کالکدرہ کے درمیان شاہراہوں پر لینڈ سلائیڈنگ ہو رہی ہے اور جمعہ کی صبح بھی لینڈ سلائیڈنگ ہوئی۔ اس وقت دکن سے کالکدرہ تک یک طرفہ سڑک بند ہے۔ تاہم یہ بڑی لینڈ سلائیڈنگ ہائی وے کے بالکل قریب آ گئی ہے جس پر اس وقت ٹریفک چل رہا ہے۔ فور لین کے درمیان لوہے کا کمپاؤنڈ ہونے کی وجہ سے ٹریفک کے راستوں پر لینڈ سلائیڈ نہیں ہوئی ہے۔ تاہم پتھر کے کچھ ٹکڑے آ گئے ہیں اور ٹریفک کے لئے خطرہ بن سکتے ہیں۔ بارش کی بڑھتی ہوئی شدت کو دیکھتے ہوئے یہاں سے گزرنے والے گاڑی مالکان سے اپیل کی جارہی ہے کہ وہ اپنی گاڑیاں احتیاط سے چلائیں۔