بامبے ہائی کورٹ نےدرخواست گزار کو مزید کوئی راحت دینے سے انکار کر دیا ہے اور بار کونسل آف مہاراشٹر اینڈ گوا کی سماعت کو جائز قرار دیا

بار کونسل آف مہاراشٹر اینڈ گوا کے ذریعہ تادیبی کارروائی کرنے اورشکایت درج کرنے کے خلاف وکیل گنارتن سداورتےنے بامبے ہائی کورٹ میں عرضداشت داخل کرتے ہوئے ان کے خلاف کونسل کی سنگل بنچ کے روبرو ہونےوالی شنوائی پر روک لگانے کی اپیل کی تھی۔بامبے ہائی کورٹ نےدرخواست گزار وکیل کو مزید کوئی راحت دینے سے انکار کر دیا ہے اور بار کونسل کی سماعت کو جائز قرار دیا ہے ۔
 وکیل گنارتن سداورتے نے بامبے ہائی کورٹ کی دو رکنی بنچ کے جسٹس گوتم ایس پٹیل اور جسٹس نیلا گوکھلے کے روبرو بار کونسل آف مہاراشٹر اینڈ گوا کے روبرو ان کے خلاف کی گئی شکایت اور ہونے والی سماعت کے فیصلہ کو چیلنج کیا تھا ۔سدا ورتے کے خلاف وکیل سشیل مانچیکر جو پمپری کورٹ بار ایسو سی ایشن کے سابق صدر بھی تھے ،  انہوں نے عوامی احتجاج کے دوران وکالت کے پیشہ سے وابستہ کورٹ پہن کر احتجاج میں شامل ہونے پر اعتراض کیا تھا اور بار کونسل آف مہاراشٹر اینڈ گوا میں شکایت درج کی تھی ۔ اس پر کونسل نے ان کے خلاف تادیبی کارروائی کرتے ہوئے مذکورہ بالا معاملہ میں سماعت شروع کی تھی ۔
 سداورتے کی جانب سے دفاع کرتے ہوئے وکیل سبھاش جھا نے عدالت سے کہا کہ مہاراشٹر اینڈ گوا بار کونسل نے سنگل بنچ کے ذریعہ میرے موکل کے خلاف کی جانے والی تادیبی کارروائی کی ضمن میں سماعت کے دوران ان پر عائد کئے گئے الزام کی بنیاد پر انہیں قصور وار ٹھہرایا ہے جو سراسر غلط ہے۔ وہیں کونسل کی جانب سے سینئر وکیل ملند ساٹھے نے عدالت کو اطلاع دیتے ہوئے کہا کہ’’ کونسل سنگل ممبر کمیٹی کے ذریعہ عائد کردہ الزام پر شنوائی کرتا ہے جو کونسل کے طے شدہ طریقہ کار کا حصہ ہے ۔ اس میں یہ بھی طے کیا جاتا ہے کہ  کسی معاملہ پر یک رکنی بنچ سماعت کرے گی یا تین رکنی کمیٹی اس ضمن میں تادیبی کارروائی کرے گی ۔ ‘‘اس اطلاع پر بامبے ہائی کورٹ کی دو رکنی بنچ نے دونوں فریقوں کی جرح سننے کے بعد کہا کہ ’’ بار کونسل آف انڈیا کی ترتیب کردہ کمیٹی ایک قانونی باڈی ہے اور اس میں ہائی کورٹ مداخلت نہیں کر سکتا  ۔ اس کے علاوہ قانون کی رو سے جس معاملہ میں یک رکنی بنچ کے روبرو معاملہ کی شنوائی کی جارہی ہے وہ قانونی باڈی کے ذریعہ بنائے گئے قانون کے عین مطابق ہے اور انہوںنے اس ضمن میں جو فیصلہ کیا ہے وہ درست ہے، اس لحاظ  سےبامبے ہائی کورٹ اس میں مداخلت نہیں کرے گا ۔