سپریم کورٹ نے بی جے پی کے لوک سبھا رکن نشی کانت دوبے کو عدالت عظمیٰ اور چیف جسٹس آف انڈیا کے بارے میں ان کے ’’ انتہائی غیر ذمہ دارانہ‘‘ اور ’’حماقت آمیز‘‘ بیانات پر سخت تنقید کا نشانہ بنایا ہے۔

سپریم کورٹ نے بی جے پی کے لوک سبھا رکن نشی کانت دوبے کو عدالت عظمیٰ اور چیف جسٹس آف انڈیا کے بارے میں ان کے ’’ انتہائی غیر ذمہ دارانہ‘‘  اور ’’حماقت آمیز‘‘  بیانات پر سخت تنقید کا نشانہ بنایا ہے۔۲۰۲۵ء کے وقف (ترمیمی) ایکٹ کی آئینی حیثیت پر جاری سماعت کے دوران، جھارکھنڈ کے گوڈا سے تعلق رکھنے والے رکن پارلیمنٹ نشنکنت دوبے نے ایک انٹرویو میں کہا تھا کہ ’’چیف جسٹس آف انڈیا سنجیو کھنہ ہندوستان میں ہونے والی تمام خانہ جنگیوں کے ذمہ دار ہیں اورملک میں مذہبی جنگ بھڑکانے کی ذمہ داری صرف اور صرف سپریم کورٹ پر عائد ہوتی ہے۔‘‘ چیف جسٹس سنجیو کھنہ اور جسٹس سنجے کمار کی بینچ نے اپنے حکم نامے میں، جو جمعرات کو سپریم کورٹ کی ویب سائٹ پر اپ لوڈ کیا گیا، کہا کہ ’’ ہمارے خیال میں یہ بیانات انتہائی غیر ذمہ دارانہ ہیں اور ان سے سپریم کورٹ اور اس کے ججوں پر بے بنیاد الزامات لگا کر توجہ حاصل کرنے کی کوشش کی گئی ہے۔‘‘  
اگرچہ سپریم کورٹ نے دوبے کے خلاف توہین عدالت کی کارروائی کی درخواست کرنے والی عوامی مفاد کی عرضی کو مسترد کر دیا، لیکن اس نے کہا کہ عدالتوں کو توہین عدالت کے اختیارات کا سہارا لے کر اپنے فیصلوں کی حفاظت کرنے کی ضرورت نہیں ہے۔ تاہم، چیف جسٹس کھنہ کی سربراہی میں بینچ نے زور دے کر کہا کہ ’’فرقہ وارانہ نفرت پھیلانے یا نفرت انگیز تقریر میں ملوث ہونے کی کسی بھی کوشش کو سختی سے نمٹا جانا چاہیے۔‘‘ اپنے حکم نامے میں، سپریم کورٹ نے دوبے کے بیان کا جائزہ لینے کے بعد کہا کہ ان کے دعووں کے مواد سے سپریم کورٹ کی حیثیت مجروح ہوتی ہے، اگرچہ یہ عدالت کے سامنے زیر التوا مقدمات میں مداخلت نہیں کرتا، لیکن اس سے انصاف کے انتظام میں رکاوٹ پیدا ہونے کا امکان ہوتا ہے۔ سپریم کورٹ نے واضح کیا کہ ہندوستان میں کوئی ’’خانہ جنگی‘‘ نہیں ہو رہی ہے، اور عدالتی فیصلے قانونی اصولوں کے مطابق کیے جاتے ہیں نہ کہ سیاسی، مذہبی یا فرقہ وارانہ سوچ کے تحت۔ چیف جسٹس کھنہ کی بینچ نے مزید کہا کہ ’’عدالتیں اور ججوں کے کندھے کافی مضبوط ہیں، اور عوام پر ان کا اعتماد ہے کہ وہ جان لیں گے کہ تنقید کب متعصبانہ، بدنام کن اور غلط ارادوں سے کی جا رہی ہے۔‘‘  
پیر کو، چیف جسٹس کھنہ کی بینچ نے دوبے کے خلاف توہین عدالت کی کارروائی کی درخواست کو مسترد کرتے ہوئے کہا تھا کہ ’’ہم ایک مختصر حکم نامہ جاری کریں گے۔ ہم اسے تسلیم نہیں کریں گے، لیکن ہم اپنے خیالات کا اظہار کرتے ہوئے ایک مختصر آرڈر دیں گے۔‘‘ واضح رہے کہ بھارتیہ جنتا پارٹی نے سپریم کورٹ کے خلاف نشی کانت دوبے کے بیانات سے خود کو الگ کر لیا ہے اور واضح کیا ہے کہ یہ بیانات ’’ذاتی رائے‘‘ ہیں اور پارٹی کے موقف کی عکاسی نہیں کرتے۔ پارٹی کے صدر جے پی نڈا نے ایکس پر ایک بیان میں کہا کہ ’’ پارٹی کا رکن پارلیمنٹ کے بیان سے کوئی تعلق نہیں ہے۔یہ ان کے ذاتی بیانات ہیں، لیکن بی جے پی ایسے بیانات سے متفق نہیں ہے اور نہ ہی کبھی ان کی حمایت کرتی ہے۔ بی جے پی ان بیانات کو مکمل طور پر مسترد کرتی ہے۔‘‘