بہار اسمبلی انتخابات کے پہلے مرحلے میں۶؍ نومبرکو۱۸؍ اضلاع کی۱۲۱؍ نشستوں پر ہونے والےپولنگ میں وزیر اعلیٰ نتیش کمار کی حکومت کے نائب وزرائے اعلیٰ سمراٹ چودھری اور وجے کمار سنہا سمیت۱۷؍ وزراءکی ساکھ داؤ پر لگی ہوئی ہے ۔ بہار اسمبلی انتخابات میں نتیش کمار حکومت کے ۱۷؍ وزیر پہلے مرحلے میں انتخابی میدان میں ہیں۔ ان میں سے۱۱؍بی جے پی سے اور۶؍جنتا جے ڈی یو کوٹے سے ہیں۔ 

بی جے پی کوٹے سے بہار کے نائب وزیر اعلیٰ سمراٹ چودھری مونگیر ضلع کی تارا پور اسمبلی حلقہ سے انتخاب لڑ رہے ہیں ۔ وہیں دوسرے نائب وزیر اعلیٰ وجے کمار سنہا لکھی سرائے سے امیدوار ہیں ۔ وجے سنہا اس سیٹ پر فروری ۲۰۰۵ء،۲۰۱۰ء ،۲۰۱۵ء ، اور۲۰۲۰ء میں کامیابی حاصل کر چکے ہیں۔وزیر صحت منگل پانڈے پہلی بار سیوان سے انتخاب لڑ رہے ہیں، جبکہ سڑک تعمیرات کے وزیر نتن نوین پٹنہ ضلع کے بانکی پور سیٹ سے امیدوار ہیں۔ نوین اس سیٹ پر لگاتار تین مرتبہ ۲۰۱۰ء،۲۰۱۵ء اور۲۰۲۰ء میں کامیاب ہو چکے ہیں۔ 

محکمہ محصولات اور اصلاحات اراضی کے وزیر سنجے سراؤگی دربھنگہ سے میدان میں ہیں اور لگاتار ۵؍ بار یہاں سے کامیابی حاصل کر چکے ہیں ۔ پنچایتی راج کے وزیر کیدار پرساد گپتا مظفرپور ضلع کے کڑھنی سے انتخاب لڑ رہے ہیں۔ سیاحت کے وزیر راجو کمار سنگھ مظفرپور ضلع کے صاحب گنج سے میدان میں ہیں، وہ اس سیٹ پر چار بار جیت چکے ہیں۔ کھیل کے وزیر سریندر مہتا بیگوسرائے ضلع کے بچھواڑا سے اور شہری ترقیات اور ہاؤسنگ کے وزیر دربھنگہ ضلع کی جالے اسمبلی سیٹ سے اپنی قسمت آزما رہے ہیں۔ وہ دو بار لگاتار یہاں جیت درج کر چکے ہیں اور اس بار انتخابی ہیٹ ٹرک لگانے کی کوشش میں ہیں۔ ماحولیات، جنگلات اور ماحولیاتی تبدیلی کے وزیر سنیل کمار نالندہ ضلع کے بہار شریف سے امیدوار ہیں۔ ڈاکٹر سنیل کمار یہاں ۵؍ بار جیت چکے ہیں اور اس بار سکسر لگانے کے لیے بے تاب ہیں جبکہ اطلاعات و ٹیکنالوجی کے وزیر کرشن کمار منٹو سارن ضلع کے امنور سے انتخاب لڑ رہے ہیں۔ 

جنتا دل یونائیٹڈ(جے ڈی یو) کوٹے سے دیہی ترقی کے وزیر شرون کمار نالندہ ضلع کی نالندہ اسمبلی سیٹ سے انتخابی میدان میں ہیں۔ وہ لگاتار ۷؍بار یہاں سے جیت چکے ہیں اور۸؍ویں بار کامیابی کی تلاش میں ہیں ۔ پارٹی کے سینئر لیڈر اور آبی وسائل و پارلیمانی امور کے وزیر وجے کمار چودھری سمستی پور ضلع کے سرائے رنجن سے لگاتار ۳؍بار جیت درج کر چکے ہیں اور اس بار انتخابی `چوکالگانے کے خواہش مند ہیں۔ 

اطلاعات و عوامی رابطہ کے وزیر مہیشور ہزاری کلیان پور محفوظ سیٹ سے انتخاب لڑ رہے ہیں۔ وہیں تعلیم کے وزیر سنیل کمار گوپال گنج ضلع کے بھورے (محفوظ) سے اور شراب بندی، مصنوعات و رجسٹریشن کے وزیر رتنیش سدا سہرسہ ضلع کے سونبرساسے انتخابی میدان میں ہیں۔ 

وہ اس سیٹ پر لگاتار۳؍ بار جیت درج کر چکے ہیں اور اس بار کامیابی کا چوکا لگانے کی پوری کوشش کریں گے۔ وہیں سماجی بہبود کے وزیر مدن سہنی دربھنگہ ضلع کے بہادرپور سے قسمت آزما رہے ہیں۔ مدن سہنی نے یہاں ۲۰۱۰ء  اور۲۰۲۰ءمیں کامیابی حاصل کی تھی جبکہ ۲۰۱۵ء میں وہ گورا باو رام سے منتخب ہوئے تھے۔