پاکستان کے ساتھ اپنے تعلقات پر صفائی دیتے ہوئے چین نے کہا کہ پاکستان ایک اچھا پڑوسی ہے اور اس کے ساتھ دفاعی اور فوجی تعاون معمول کا حصہ ہے۔

چین نے ایک بیان میں کہاکہ ہندوستان اور پاکستان پڑوسی ملک ہیں جنہیں  اپنے سے دور نہیں کیا جاسکتا۔اسی کے ساتھ اس بات کی صفائی بھی دی کہ پاکستان کے ساتھ اس کا دفاعی اور فوجی تعاون ’معمول‘ کا حصہ ہے اور اس نے جنوبی ایشیا میں علاقائی استحکام پر زور دیا ہے۔چینی وزارت خارجہ ترجمان ماؤ ننگ نے پیر کو بیجنگ میں براہ راست نشر ہونے والی نیوز کانفرنس سے خطاب کرتے ہوئے کہا کہ چین اور پاکستان روایتی، اچھے ہمسایہ ہیں اور دفاع اور فوجی شعبوں میں تعاون معمول کی بات ہے جو کسی تیسرے ملک کو نشانہ نہیں بناتا۔وہ پاکستان اور ہندوستان کے درمیان حالیہ کشیدگی کے تناظر میں اسلام آباد اور بیجنگ کے درمیان تعلقات سے متعلق سوالات کا جواب دے رہی تھیں۔
 پاکستان کے ساتھ چین کے تعلقات کے بارے میں پوچھے جانے پر ماؤ نے جواب دیا کہ’فیصلہ ہر شخص میں مختلف ہوتا ہے۔‘  انہوں نے کہا کہ ہمسایہ ممالک کی حیثیت سے ہندوستان اور پاکستان کو دور نہیں کیا جا سکتا اور ہم دونوں ممالک کے اختلافات کو مناسب طریقے سے حل کرنے اور مشترکہ طور پر خطے میں امن و استحکام برقرار رکھنے کے لیے بات چیت اور مشاورت کی حمایت کرتے ہیں۔
 نئی دہلی کے ساتھ تعلقات کو بہتر بنانے کے بارے میں ماؤ نے کہا کہ ’’چین،ہندوستان تعلقات بہتری کے نازک لمحے میں ہیں... ہم چین  ہندوستان تعلقات کی مستحکم ترقی کو فروغ دینے کیلئے ہندوستان کے ساتھ کام کرنا چاہتے ہیں۔‘‘ماؤ نے کہا کہ بیجنگ نے دلائی لامہ کے معاملے پر نئی دہلی کے سامنے احتجاج درج کرایا ہے۔