آئی ایم ایف کی رپورٹ میں ڈجیٹل لین دین میں ہندوستان نمبروَن ہے۔ یو پی آئی کے ذریعے ہر ماہ۱۸۰۰؍ کروڑ سے زیادہ کا لین دین۔

ہندوستان نے تیز رفتار اور محفوظ ڈجیٹل ادائیگی کے شعبے میں دنیا میں پہلا مقام حاصل کیا ہے۔ بین الاقوامی مالیاتی فنڈ (آئی ایم ایف) کی حالیہ رپورٹ کے مطابق ہندوستان نے یونیفائیڈ پیمنٹس انٹرفیس (یو پی آئی) کی بدولت ڈجیٹل لین دین میں یہ مقام حاصل کیا ہے۔۲۰۱۶ء میںنیشنل پیمنٹس کارپوریشن آف انڈیا (این پی سی آئی)  کے ذریعہ شروع کیا گیا یو پی آئی  آج ملک میں پیسے کے لین دین کا سب سے آسان اور مقبول طریقہ بن گیا ہے۔ یو پی آئی  کی مدد سے، لوگ اپنے متعدد بینک اکاؤنٹس کو ایک موبائل ایپ کے ساتھ لنک کر سکتے ہیں اور چند سیکنڈ میں محفوظاور کم  مالیت کے لین دین کر سکتے ہیں۔
 این پی سی آئی کے مطابق  یو پی آئی  کے ذریعے ہر ماہ۱۸۰۰؍ کروڑ سے زیادہ کا لین دین ہوتاہے۔ جون۲۰۲۵ء میں یو پی آئی  نے۱۸۳۹؍ کروڑ لین دین کے ساتھ ۲۴ء۰۳؍ لاکھ کروڑ روپے کا کاروبار  کیا  جو کہ گزشتہ سال جون۲۰۲۴ء میں۱۳۸۸؍ کروڑ  کے لین دین کے مقابلے میں۳۲؍فیصد زیادہ ہے۔ 
 یو پی آئی  ڈجیٹل معیشت کی طرف بڑھ رہا ہے 
  `یو پی آئی نے ہندوستان کو نقد اور کارڈ پر مبنی ادائیگیوں سے نجات دلانا شروع کردیا  ہے اور ڈجیٹل  کے غلبہ والی معیشت کی طرف لے جارہا ہے۔ یہ پلیٹ فارم نہ صرف بڑے کاروباری اداروں بلکہ چھوٹے دکانداروں اور عوام کے لیے بھی مالی شمولیت کا ایک مضبوط ذریعہ بن گیا ہے۔
 ڈجیٹل ادائیگیوں کا ۸۵؍فیصد یو پی  آئی کا حصہ  
 آج ہندوستان میں ۸۵؍ فیصد ڈجیٹل ادائیگیاں یو پی آئی  کے ذریعے کی جا رہی ہیں، جس میں۴۹ء۱؍ کروڑ صارفین،۶ء۵؍ کروڑ تاجر اور ۶۷۵؍ بینک ایک پلیٹ فارم سے جڑے ہوئے ہیں۔ صرف یہی نہیں یو پی آئی  اب عالمی سطح پر بھی تقریباً ۵۰؍فیصد حقیقی وقت کی ڈجیٹل ادائیگیوں کو سنبھال رہا ہے۔
 یو پی آئی کا استعمال ہندوستان سے باہر بھی  
 یو پی آئی  کا اثر اب ہندوستان کی سرحدوں کے باہر بھی نظر آرہا ہے۔ ۷؍ممالک متحدہ عرب امارات، سنگاپور، بھوٹان، نیپال، سری لنکا، فرانس اور ماریشس میں بھی یہ دستیاب ہے۔ فرانس میں یو پی آئی  کا آغاز یورپ میں اپنے پہلے قدم کی نشاندہی کرتا ہے، جس سے ہندوستانیوں کیلئے  ادائیگی کرنا آسان ہو گیا ہے جو بیرون ملک مقیم ہیں یا سفر کر رہے ہیں۔
   `یہ صرف اعداد و شمار کا معاملہ نہیں ہے  بلکہ یہ ہندوستان کے ڈجیٹل فریم ورک میں بڑھتے ہوئے اعتماد اور کیش لیس معیشت کی جانب تیز رفتار اقدامات کی عکاسی کرتا ہے۔  یوپی آئی  نے نہ صرف لین دین کو آسان بنایا ہے بلکہ چھوٹے تاجروں اور دیہی علاقوں میں رہنے والے عوام کو بھی ڈجیٹل معیشت سے جوڑ دیا ہے۔ یو پی آئی کی یہ کامیابی ہندوستان کو تکنیکی اختراعات اور مالی شمولیت میں عالمی لیڈر کے طور پر قائم کر رہی ہے۔
یو پی آئی  کیسے کام کرتا ہے؟
 یو پی آئی  سروس کے لیے  آپ کو ورچوئل ادائیگی کا ایڈریس بنانا ہوگا۔ اس کے بعد اسے بینک اکاؤنٹ سے لنک کرنا ہوگا۔ اس کے بعد آپ کے بینک اکاؤنٹ نمبر، بینک کا نام یا آئی ایف ایس سی   کوڈ وغیرہ کو یاد رکھنے کی ضرورت نہیں ہے۔ ادائیگی کرنے والا شخص صرف آپ کے موبائل نمبر کے مطابق ادائیگی کی درخواست پر کارروائی کرتا ہے۔ اگر آپ کے پاس اس کا یو پی آئی آئی ڈی (ای میل آئی ڈی، موبائل نمبر یا آدھار نمبر) ہے تو آپ اپنے اسمارٹ فون کے ذریعے آسانی سے رقم بھیج سکتے ہیں۔ نہ صرف پیسے بلکہ آپ کو یوٹیلیٹی بل کی ادائیگی، آن لائن شاپنگ، شاپنگ وغیرہ کے لیے نیٹ بینکنگ، کریڈٹ یا ڈیبٹ کارڈ کی بھی ضرورت نہیں پڑے گی۔ آپ یہ تمام کام یونیفائیڈ پیمنٹ انٹرفیس سسٹم کے ذریعے کر سکتے ہیں۔