جی ایس ٹی میں تخفیف کے بعد وزارت بھاری صنعت کی ہدایات کے تحت پرانی اور نئی قیمتیں دکھانے والے پوسٹرس ڈیلرشپ پر لگائیں گے، لگژری کار کمپنیوں کو رعایت ۔

بھاری صنعت کی وزارت (ایم ایچ آئی) نے ملک کی تمام کار اور بائیک کمپنیوں سے کہا ہے کہ وہ اپنے ڈیلرشپ پر پوسٹر لگائیں، جس میں جی ایس ٹی میں کٹوتی کے بعد پرانی قیمت اور نئی قیمت دکھائی جائے۔ ان پوسٹرس میں وزیر اعظم نریندر مودی کی تصویر بھی شامل ہوگی۔ حکومت کے عہدیداروں اور صنعت کے عہدیداروں نے  ایک تجارتی ویب سائٹ  سے معاملے کی تصدیق کی۔

یہ بھی پڑھیئے:زیورات کی مانگ میں۱۴؍ فیصد کمی، پھر سونے کی قیمت آسمان پر کیسے پہنچی؟

وزارت نے یہ ہدایت سوسائٹی آف انڈین آٹوموبائل مینوفیکچررس(ایس آئی اے ایم) کے ذریعے کمپنیوں کو بھیجی ہے۔ اب کمپنیوں کے عہدیدار پوسٹرز کو ڈیزائن کر رہے ہیں اور وزارت سے منظوری ملنے کے بعد ہی انہیں ڈیلرشپ پر لگائیں گے۔ تاہم ابھی تک یہ طے نہیں ہوا ہے کہ پوسٹرز کی پرنٹنگ اور تقسیم کے اخراجات کمپنیاں یا ڈیلرشپ برداشت کریں گی۔ حکام کا کہنا ہے کہ مختلف جگہوں کے لیے مقامی زبانوں میں پوسٹرز تیار کیے جائیں گے، جس سے یہ سوال اٹھتا ہے کہ کیا ہر زبان میں پوسٹرز کے لیے الگ الگ منظوری درکار ہے۔
صنعت کے ایک   ذرائع  کے مطابق آٹوموبائل کمپنیاں اس پوری مشق پر کم از کم۲۰۔۳۰؍کروڑ روپے خرچ کریں گی۔ توقع ہے کہ یہ پوسٹرز اس ہفتے کے آخر تک ڈیلرشپ پر لگائے جائیں گے۔ لگژری کار کمپنیاں اس اصول سے مستثنیٰ ہیں۔
 بڑی کار کمپنیوں جیسے ماروتی سوزوکی، ہنڈائی، ٹاٹا موٹرز، مہندرا اینڈ مہندرا، ٹویوٹا اور کیا نے پہلے ہی کہا ہے کہ وہ جی ایس ٹی کٹوتی کا پورا فائدہ صارفین تک پہنچائیں گے، جس کی وجہ سے تمام کاروں کی قیمتوں میں کمی آئی ہے۔ جی ایس ٹی کونسل نے حال ہی میں چھوٹی کاروں پر ٹیکس کو ۳۱؍فیصد سے کم کر کے۱۸؍ فیصد کر دیا ہے۔ بڑی گاڑیوں پر ٹیکس کی شرح۵۰؍ فیصد سے کم کر کے۴۰؍ فیصد کر دی گئی ہے اور معاوضہ سیس ختم کر دیا گیا ہے۔