جموں کشمیر نے کلیانی میں کھیلے گئے سیمی فائنل کے چوتھے دن بنگال کو چھ وکٹوں سے شکست دے کر تاریخ رقم کر دی اور پہلی بار رنجی ٹرافی کے فائنل میں جگہ بنا لی۔ عاقب نبی کو میچ کا بہترین کھلاڑی قرار دیا گیا۔

بدھ کو کلیانی کے بنگال کرکٹ اکیڈمی گراؤنڈ میں کھیلے گئے سیمی فائنل میں جموں کشمیر کرکٹ ٹیم نے بنگال کرکٹ ٹیم کو چھ وکٹوں سے شکست دے کر پہلی بار رنجی ٹرافی کے فائنل میں رسائی حاصل کر لی۔ بنگال نے اپنی دوسری اننگز میں صرف ۹۹؍ رنز بنائے، جس کے بعد جموں کشمیر کو جیت کے لیے ۱۲۶؍ رنز کا ہدف ملا۔ ٹیم نے یہ ہدف ۴ء۳۴؍ اوورز میں چار وکٹوں کے نقصان پر حاصل کر لیا۔

عاقب نبی کی شاندار کارکردگی
آل راؤنڈر عاقب نبی نے ایک بار پھر متاثر کن کارکردگی کا مظاہرہ کرتے ہوئے میچ میں مجموعی طور پر نو وکٹیں حاصل کیں اور انہیں میچ کا بہترین کھلاڑی قرار دیا گیا۔ سنیل کمار کے ساتھ مل کر انہوں نے بنگال کی بیٹنگ لائن اپ کو دباؤ میں رکھا۔ہدف کے تعاقب میں ونشاج شرما نے ۴۳؍ رنز اور عبدالصمد نے ناقابلِ شکست ۳۰؍ رنز کی اننگز کھیل کر ٹیم کو فتح دلائی۔ عبدالصمد کی جارحانہ بیٹنگ میں شہباز احمد کے خلاف لگائے گئے دو شاندار چھکے شامل تھے، جنہوں نے میچ کا رخ بدل دیا۔ صبح کے سیشن میں بنگال کے فاسٹ بولرز محمد سمیع اور آکاش دیپ نے جلد وکٹیں حاصل کر کے دباؤ بڑھایا، لیکن جموں کشمیر کے بلے بازوں نے سنبھل کر کھیلتے ہوئے ہدف حاصل کر لیا۔

یہ بھی پڑھئے: آسٹریلیا کی مہم انتہائی ناقص تھی: رکی پونٹنگ اپنی ٹیم پر برس پڑے

مختصر اسکور
بنگال: ۳۲۸؍ اور ۹۹
جموں کشمیر: ۳۰۲؍ اور ۴؍ وکٹ پر ۱۲۶؍ رن (۴ء۳۴؍ اوورز)
جموں کشمیر چھ وکٹوں سے کامیاب

کرناٹک سے فائنل مقابلہ

جموں کشمیر اب ۲۴؍ سے ۲۸؍ فروری تک ہونے والے فائنل میں کرناٹک کا مقابلہ کرے گا۔ ٹیم کی حالیہ کارکردگی نے انہیں سرخ گیند کی کرکٹ میں ایک مضبوط دعویدار کے طور پر ابھارا ہے۔ ۱۸؍ فروری فروری کا دن جموں کشمیر کی کرکٹ تاریخ میں سنہری حروف سے لکھا جائے گا، کیونکہ یہ ٹیم پہلی بار ملکی سطح کے سب سے بڑے ٹورنامنٹ کے فائنل میں پہنچی ہے۔

یہ بھی پڑھئے: ویمنز ٹینس میں بڑے انقلاب کی دستک: جیسیکا پیگولا کو اہم ذمہ داری سونپی گئی

وزیر اعلیٰ عمر عبداللہ کی مبارکباد
جموں و کشمیر کے وزیر اعلیٰ عمر عبداللہ نے ٹیم کو شاندار کامیابی پر مبارکباد پیش کی۔ انہوں نے کھلاڑیوں، کوچز اور معاون عملے کی اجتماعی محنت اور نظم و ضبط کو سراہا۔ انہوں نے کہا کہ یہ کامیابی صرف ایک فرد کی نہیں بلکہ پوری ٹیم اور اس کے معاون عملے کی مشترکہ کوششوں کا نتیجہ ہے۔ وزیر اعلیٰ نے امید ظاہر کی کہ مستقبل قریب میں جموں کشمیر کے کھلاڑی قومی ٹیم میں اہم کردار ادا کرتے نظر آئیں گے۔ انہوں نے یہ بھی کہا کہ اس کامیابی سے خطے کے نوجوان کرکٹرز کو تحریک ملے گی اور حکومت کھیلوں کے بنیادی ڈھانچے کو مزید مضبوط بنانے کے لیے پرعزم ہے۔