اسرائیلی فوجوں نے غزہ میں ’’خطرناک دنوں‘‘کیلئے تیاری شروع کردی۔

غزہ میں امن منصوبہ پر غوروخوض کے بیچ اسرائیلی حملوں میں کسی طرح کی کمی نہیں آئی ہے۔ بدھ کو  علی الصباح   سے اس خبر کے لکھے جانے تک اسرائیلی حملوں میں  ۶۱؍ فلسطینی  شہید ہوئے ہیں۔ان میں سے ۴۴؍ نے غزہ شہر میں  جام شہادت نوش کیا۔ اسرئیل جنوبی غزہ پر حملوں  میں شدت کی تیاری کررہاہے۔اس نے جنوبی  غزہ سے جان بچاکر شمالی غزہ جانے کیلئے بچے واحد راستہ کو بھی بند کردیا ہے۔ 
 حملوں کی شدت کا عالم یہ ہے کہ غزہ میں عالمی ریڈ کراس نے اپنا کام عارضی طور پر معطل کر دیا۔ عرب میڈیا کے مطابق ریڈ کراس کا کہنا ہے کہ غزہ میں کارروائی اسرائیلی حملوں میں تیزی کے باعث معطل کی ہے۔ 
  اس بیچ اسرائیلی فوج نے ’خطرناک دنوں‘ کیلئے تیاری شروع کر دی ہے۔اسرائیلی فوج کے چیف آف اسٹاف ایال زامیر نے غزہ کا دورہ کیا، جہاں انھوں نے ایلیٹ یونٹس کے اہل کاروں سے ملاقات کی۔انہوں نے فوجیوں کو چوکنا رہنے اور ہر ممکن تیاری کی ہدایت  دی ہے۔