سابق امریکی صدر ڈونالڈ ٹرمپ کا کہنا ہے کہ عوام کو پہلے سے ہی معلوم ہے کہ `میں کون ہوں ۔ ان کا یہ اقدام ایک ایسے وقت سامنے آیا ہے، جب انہیں متعدد قانونی چارہ جوئیوں کا سامنا ہے

 امریکہ کے سابق صدر ڈونالڈ ٹرمپ نے گزشتہ روز اس بات کی تصدیق کی کہ وہ بدھ کے روز ٹیلی ویژن پر ہونے والے پہلے ریپبلکن پارٹی کے صدارتی امیدوار کے ابتدائی مباحثے میں حصہ نہیں لیں گے۔ڈونالڈ ٹرمپ نے سوشل میڈیا پلیٹ فارم ’ ٹروتھ‘ پر اپنی ایک پوسٹ میں لکھاکہ ’’عوام کو معلوم ہے کہ میں کون ہوں اور میں نے کس قسم کی کامیاب صدارت پیش کی تھی۔‘‘
 ۲۰۲۴ء کے صدارتی انتخابات سے قبل ریپبلکن ووٹروں میں اپنی مقبولیت کے ثبوت میں حالیہ رائے عامہ کے جائزوں میں اپنی برتری کا ذکر کرتے ہوئے ٹرمپ نے مزید کہا کہ ’’اسی لئے میں مباحثوں میں شرکت نہیں کروں گا۔‘‘صدارتی امیدواری کیلئے پارٹی کے ابتدائی مباحثوں میں ٹرمپ کی غیر حاضری پر پہلے ہی سے قیاس آرائیاں کی جارہی تھیں ۔ وہ مہینوں سے بار بار اپنا یہ موقف دہراتے رہے ہیں کہ وہ پارٹی میں اپنے دیگر حریفوں کو موقع دینے کی اہمیت کو قطعی اہم نہیں سمجھتے۔
 واضح رہے کہ آئندہ بدھ کو ملواکی میں ریپبلکن پارٹی کے دیگر صدارتی امیدوار کیلئے کوشش کرنے والے امیدوار پہلی بار جمع ہونے والے ہیں اور اس موقع پر وہ انتخابات میں ٹرمپ کی برتری کے پیش نظر ان پر سیاسی حملہ کرنے کی کوشش کریں گے۔
 اتوار کو ہونے والے سی بی ایس کے سروے سے پتہ چلتا ہے کہ ریپبلکن ووٹروں میں سے ۶۲؍ فیصد کیلئےسابق صدر ٹرمپ پسندیدہ امیدوار ہیں ۔ ان کے قریبی حریف فلوریڈا کے گورنر رون ڈی سینٹیس ہیں جنہیں ، صرف ۱۶؍ فیصد ووٹروں کی حمایت حاصل تھی۔ اس دوڑ میں شامل دیگر ریپبلکن امیدواروں کو ۱۰؍ فیصد سے بھی کم ووٹروں کی حمایت حاصل ہے۔اس رائے شماری میں ٹرمپ کی نمایاں برتری اس بات کی عکاس ہے کہ سابق صدر پر ۴؍ معاملات میں فرد جرم عائد ہونے کے باوجود وہ ریپبلکن پارٹی میں اب بھی کافی مقبول ہیں ۔
 بدھ کو ہونے والے مباحثے میں ڈی سینٹس کے علاوہ سابق امریکی نائب صدر مائیک پینس اور جنوبی کیرولینا کی سابق گورنر نکی ہیلی کی بھی بحث میں حصہ لینے کی توقع ہے۔اس ہفتے کی بحث میں ٹرمپ کی غیر موجودگی ان کے حریفوں میں ڈی سینٹیس جیسے سیاستداں کو ان کے خلاف سیاسی زمین حاصل کرنے میں مدد حاصل ہو سکتی ہے۔مباحثے میں شامل دیگر امیدواروں میں سے نیو جرسی کے سابق گورنر کرس کرسٹی پر سب کی نظریں ہوں گی جو پورے پروگرام میں ٹرمپ پر مسلسل حملہ کر سکتے ہیں ۔ چونکہ سابق صدر اسٹیج پر موجود نہیں ہوں گے اس وجہ سے وہ اپنے خلاف الزامات کا بر وقت دفاع بھی نہیں کر پائیں گے۔