شیوسینا بنام شیوسینا قانونی جنگ کی شنوائی کے دوران سپریم کورٹ نے منگل کو یہ اہم سوال اٹھایا کہ کیا پارٹی کیلئے مختص انتخابی نشان  (تیر کمان) ایسے افراد کو دینا مناسب ہے  جو دَل بدلی جیسے ’آئینی گناہ‘ کے ملزم ہیں؟

شیوسینا بنام شیوسینا قانونی جنگ کی شنوائی کے دوران سپریم کورٹ نے منگل کو یہ اہم سوال اٹھایا کہ کیا پارٹی کیلئے مختص انتخابی نشان  (تیر کمان) ایسے افراد کو دینا مناسب ہے  جو دَل بدلی جیسے ’آئینی گناہ‘ کے ملزم ہیں؟

چیف جسٹس آف انڈیا سوریہ کانت کی سربراہی میں جسٹس جوئے مالیا باغچی اور جسٹس وی موہنا پر مشتمل بنچ نے یہ سوال اس وقت اٹھایا جب شندے  سینا  کی جانب سے  سینئر وکیل نیرج کشن کول اپنے دلائل  پیش کررہے تھے۔ جسٹس باغچی نے پوچھا کہ  ’’انتخابی نشان  کے اپنے جذبات ان لوگوں کے حق میں ہوں  گے جنہوں نے آئینی گناہ کیا ہے یا ان  کے حق میں  ہوں گے جنہوں نے آئینی گناہ کی شکایت کی ہے؟‘‘ سہ رکنی بنچ ۲۰۲۲ء میں  شیوسینا میں ہونےوالی  تقسیم سے متعلق درخواستوں کے ایک مجموعے  پر  سماعت کر رہی ہے۔ ان میں ادھو ٹھاکرے کی جانب سے داخل  وہ درخواست بھی شامل ہے جس میں پارٹی کا نام اور انتخابی نشان شندے گروپ کو دینے کے الیکشن کمیشن  کے فیصلے کو چیلنج کیاگیا ہے۔سینئر وکیل نیرج کشن کول نےاراکین اسمبلی کی اکثریت کو پارٹی کی اکثریت  تسلیم کرنے کے الیکشن کمیشن  کے موقف کا دفاع کرتے ہوئے کہا کہ انتخابی نشان (ریزرویشن اینڈ الاٹمنٹ) آرڈر کے تحت یہ طے کرنے کیلئے  کہ کون سا گروپ سیاسی پارٹی کی حیثیت رکھتا ہے، قانون ساز پارٹی (اراکین اسمبلی کی تعداد) کی اکثریت  کی بنیاد پر فیصلہ کرنا درست ہے۔